Áńgimeniń álqıssasyn Dımashpen bastamasaq asqaq kóńilimizdi alasartyp alardaı alasurǵanymyz ras. Munyń oǵan qandaı qatysy bar dep muńdanýyńyz da múmkin. Áıtse de shynaıy ónerde eshqandaı ereje bolmaıdy. Talant jerdiń arǵy betinde de talant ekenin taǵy aıtqymyz keledi. Qazaq balasynyń mıllıardtaǵan qytaıdy tańdaı qaqtyrǵany esińizde me? Sol álemdik dodada dúldúl ul «The show must go on», ıakı «Shoý jalǵasýy kerek» kompozısııasyn oryndap, aǵylshyndardy da jylatqan edi. Jylamaı qaıtsin, jetpisinshi jyldary kúlli batys elderi «Bogemalyq rapsodııa» sanap, ónerine tabynǵan Freddı Merkıýrıdi qaıta tiriltkendeı boldy. Biz búgin sol kúni brıtandyqtardyń nege eljireı egilgenin aıtqymyz keledi.
Dańqy kókke órlegen «Queen» rok-tobynyń ánshisi Freddı Merkıýrı mýzykada erkindiktiń jyrshysy sanaldy. О́nerdegi modernızmge jańasha reń berdi, ǵumyrynyń sońyna deıin bogemııa stılin jańǵyrtty. О́ler aldynda «Innuendo» atty sońǵy stýdııalyq albomyn jaryqqa shyǵaryp, máńgilik saǵynyshqa aınaldy. Bul onyń SPID dertimen kúresip júrgen kezi edi. Plastınkamen jumys istep jatqanda ánshiniń densaýlyǵy kúrt nasharlap, uzaq ómir súrmeıtinine kózi jetedi. Bálkim, bul taǵdyrdyń «Shoý jalǵasýy kerek» áni arqyly ajalynyń jaqyndaǵanynan habar bergeni bolar. Kim bilsin?! Odan óńge jańa týyndyny shyrqaýǵa shamasy da, ýaqyty da jetpedi.
Kompozısııa top barabanshysy Rodjer Teılor men mýzykant Djon Dıkon jazǵan akkordtyq progressııadan bastaldy. Mátinniń negizgi bóligin kınokompozıtor Braıan Meı jazǵan, biraq bul proseske Freddı Merkıýrı de qatysqan. Ásirese mátinin jazýda sheshýshi ról atqarǵany aıtylady. Ony Meı bylaısha eske alady:
«Bastapqyda bul ánsheıin akkordtardyń úılesimi sekildi kórindi. Biraq men onyń mańyzdy nársege aınalýy múmkin ekenin sezindim. Janymdy naǵyz áýenge degen qumarlyq basyp aldy. Shyǵarmany yjdaǵattylyqpen qolǵa aldym. Biz Freddımen birge otyryp, taqyryptyń qandaı bolýy kerektigin oılastyrdyq. Sóıtip, mátinin jazdyq. Týyndynyń onyń ómirinde mańyzdy oryn alatynyn uǵyndym. Ári qaraı bári ańyz», deıdi avtor jazbasynda.
Ánniń ón boıynda jeke adamnyń kúreskerlik rýhy jatyr. Shyǵarma qurylymy kóptegen beıneli metaforaǵa toly. Árbir joldy ártúrli teńeýmen túrlendirip, aqıqatpen astastyrǵan. Ádette, kompozısııanyń jasalý tarıhyn biletin mýzyka áýesqoılary Freddıdiń jeke qasiret týraly jyrlaǵanyna senimdi. Baqsańyz, fınalǵa jaqyndaǵan saıyn keıipkerdiń batyldyǵy, ómir súrýge degen qushtarlyǵy artady. «Men jeńiske erik tabýym kerek», «Men shoýdy jalǵastyrý úshin kúsh tabýym kerek», «Meniń júregim ishten jarylyp jatyr» degen jigerli sóılemder oryndaýshynyń jan azabynan habar beredi.
Jalpy, atalǵan rok-topta ishinara jazylmaǵan ereje bar. Ol ánniń sózi qandaı bolsa da talqylanbaıdy. Keıde mátin avtordyń jeke kózqarasyna qurylýy múmkin, sondyqtan ony túzeý ádepsizdik bolyp sanalady. Mýzykanttar muny jaqsy baǵamdady. Shyǵarmadaǵy qasiretke toly, muńly sóılemder neni bildiretinin, nege jıi kezdesetinin eshkim suramady.
«The Show Must Go On» ánin taspaǵa jazý barysynda Merkıýrı ózin nashar sezinedi. Muny baıqaǵan Braıan Meı týyndyny jaqsy notada alyp shyǵaryna kúmánmen qaraıdy. Onysy jón de, sebebi falset tym joǵary bolǵandyqtan, ánshige qysym kóbirek tústi. Biraq ónerpaz sońǵy demi qalǵansha bar daýsymen aıqaılap, júrekpen oryndap shyǵady. Ári ánge qaıtalanbas óń berip, kórermenniń jan dúnıesine máńgi umytpastaı móldirlik quıady.
О́kinishke qaraı, toptyń hıtke aınalǵan ǵajaıyp ánin Freddı kópshilik aldyna oryndaı almady. Sondyqtan beıneklıptiń túsirilimine top frontmeniniń qatysýy týraly áńgime bolǵan joq. Biz tamashalap júrgen jelidegi nusqasy ánshiniń densaýlyǵy syr bermeı turǵan shaqtaǵy beınesi. Osylaısha, ánniń tarıhy Freddımen bastalyp, Freddımen aıaqtaldy. Ol týraly «Bogemalyq rapsodııa» atty fılm de jaryqqa shyqty. Árıne, óte aıanyshty. Sodan da bolar, aǵylshyndar ándi áli kúnge deıin júregi eljirep tyńdaıdy.
Al bizdiń Dımash kórermenge sol sezimdi syılaı alýymen qundy. Sol sátte onyń úni, ándi sezinýi tyńdarmandaryn tańdaı qaqtyrdy. О́nerpazdyń bar yntasymen salǵan áni álemdi áli de áldılep turǵandaı.
Qarańyzshy, 2005 jyly Music Choice telekanaly 50 myńǵa jýyq eýropalyqtan ózderiniń jerleý rásiminde qandaı án oryndalýyn suraıdy. Sonda barsha jankúıer biraýyzdan «Shoý jalǵasýy kerek» dep jaýap beripti.
