Qutqarýshylar tobyna jetekshilik etken Tótenshe jaǵdaılar birinshi vıse-mınıstri Ibragım Kúlshimbaev Túrkııadaǵy izdestirý-qutqarý jumystary joǵary psıhoemosıonaldy júkteme jaǵdaıynda júrgizilgenin aıtty.
– Izdestirý-qutqarý jumystaryn júrgizýdiń qıyndyǵy mynada: tórt qabatty plıtalardyń birinshi qabat pen turaq arasyndaǵy qashyqtyǵy 25-30 sm-den aspaıdy. Jumys júrgizýge kúnniń sýyqtyǵy, aftershoktar da kedergi boldy. Búkil kezeń boıy izdestirý-qutqarý jáne avarııalyq-qutqarý jumystary úzdiksiz júrgizildi. Sonymen qatar jumys qaza tapqandardyń kóptiginen jáne tótenshe jaǵdaı aımaǵynda olardyń týystary men jaqyndarynyń bolýymen baılanysty joǵary psıhoemosıonaldy júkteme jaǵdaıynda júrgizildi, – dedi Ibragım Kúlshimbaev.
Qazaqstan TJM tobyna Gazıantep qalasynyń Ibrahımılı aýdanyndaǵy eki nysan (tolyǵymen qıraǵan eki toǵyz qabatty úı, jeti qabatty úı, jartylaı qıraǵan alty qabatty úı), Nurdaǵy qalasyndaǵy (tolyǵymen qıraǵan alty qabatty úı), Hataı qalasynda (tolyǵymen qıraǵan alty qabatty úı) bekitilgen. Qutqarýshylarǵa Túrkııa Respýblıkasynyń joǵary oqý oryndarynda oqıtyn qazaq stýdentteri kómektesken. Olar volonter-aýdarmashy retinde qyzmet atqarǵan. Al Qazaqstannan barǵan dárigerler zardap shekken turǵyndarǵa táýlik boıy bilikti medısınalyq jáne psıhologııalyq kómek kórsetken.
– Jumys kezeńinde 200-den astam jergilikti turǵyn men qutqarýshyǵa, onyń ishinde 30-ǵa jýyq balaǵa medısınalyq kómek kórsetildi. Túrkııada joıqyn jer silkinisiniń saldaryn joıý boıynsha jumys istegen 10 dárigerdiń úsheýi – áıel, – dedi vıse-mınıstr.
Qutqarý jumystary kezindegi kınologııalyq toptyń jóni bir bólek. Ibragım Kúlshimbaevtyń aıtýynsha, olar ózderiniń joǵary biliktiligin kórsetken. Ortalyq kommýnıkasııalar qyzmeti alańyna kınolog-nusqaýshymen birge Mırta atty nemis ovcharkasy keldi. Mırta Túrkııada úıindiler astynda qalǵan 3 adamdy tapqan. Sondaı-aq belgııalyq malınýa ovcharkalary Djeıkob, Lıga M Sırıýs jáne Aksel, labrador Charlı Kıng, Grınpıs esimdi border kollı, kınolog-nusqaýshylarmen jáne qutqarýshy jasaqtarmen birge birneshe kún boıy qıraǵan nysandarda jumys istep, ár adamnyń ómiri úshin kúresken. Osylaısha, TJM-niń Túrkııada júrgizilgen izdestirý-qutqarý jumystary barysynda alǵa qoıylǵan mindetteri tolyq kólemde oryndalǵan.
Prezıdent tapsyrmasymen Túrkııada bolǵan joıqyn jer silkinisiniń saldaryn joıýǵa kómektesý úshin TJM Astana, Almaty qalalary men Aqmola, Qaraǵandy oblystarynyń qutqarýshylary tartylǵan. Sondaı-aq tabıǵı apat aımaǵyna 55 tonna kóleminde gýmanıtarlyq kómek jetkizildi. TJM atynan ardagerler keńesiniń muryndyq bolýymen zardap shekkenderge kómek kórsetý úshin 10 kıizúı jiberilgen.
– Túrkııa Respýblıkasynyń AFAD jer silkinisi saldaryn joıý daǵdarys ortalyǵy jáne Qazaqstannyń Túrkııa Respýblıkasyndaǵy elshiligimen kelisim boıynsha 17 aqpanda barlyq nysandarda TJM kúshterimen izdestirý-qutqarý jumystary aıaqtaldy, – dep málimdedi Ibragım Kúlshimbaev.
Baýyrlas elge kómek kórsetip, erlik tanytqan qutqarýshylar marapattalyp, TJM atynan qarjylaı syıaqy beriledi.
