Parlament Májilisiniń depýtattyǵyna «Aýyl» partııasy atynan túsetin kandıdattar men jergilikti máslıhattar depýtattyǵyna úmitkerler úgit-nasıhat jumysyn kúndizgi saǵat 11.00-de qoǵamdyq qólikterdiń sońǵy aıaldamasynan bastady. Aldymen avtobýstardy «Aýyl» partııasynyń saılaýǵa qatysty «Aýyl tórge shyqsyn!» sııaqty urandar jazylǵan jarnamamen árledi. Keıin kandıdattar men belsendiler úsh topqa bólinip, qala turǵyndarymen, jolaýshylarmen kezdesti. Is-shara aıasynda avtobýsqa kirgen jolaýshylarǵa partııanyń saılaýaldy baǵdarlamasynyń negizgi baǵyttary túsindirildi. Halyqtan jergilikti atqarýshy organnyń jumysyn jaqsartýǵa arnalǵan usynystardy jınady.
– Partııa ákimder men máslıhat depýtattarynyń halyq aldyndaǵy derbes jaýapkershiligin kúsheıtedi. Ol úshin jergilikti memlekettik basqarý jáne ózin-ózi basqarý týraly zańnamany túbegeıli qaıta qaraıdy. Olar halyq aldyndaǵy mindetterin oryndamaǵan jaǵdaıda eń qatań sharalardy qoldanýǵa qol jetkizedi, – dedi Parlament Májilisi saılaýyna «Aýyl» partııasy atynan túsetin kandıdat Dáýletkereı Kápuly.
Keıin kandıdattar avtobýstar tıesili avtoparkke baryp, kólik júrgizýshilerimen kezdesti. Kólik júrgizýshileri ózderin tolǵandyratyn máselelermen, atap ótsek, jalaqy, eńbek jaǵdaılary, jumys júktemesi týraly suraqtarmen bólisip, eńbek adamynyń mártebesin kóterý týraly usynystaryn partııa ókilderine jetkizdi.
Kandıdat Qaırat Aıtýǵanovtyń aıtýynsha, «Aýyl» partııasy Májiliske barǵanda eńbek adamyna erekshe quqyqtyq mártebe berýge qol jetkizedi. Partııanyń aýyldyqtarǵa ǵana emes, qalalyqtarǵa da usynatyn kóptegen baǵyty bar ekenin atap ótti. «Qýatty aýyl – eldiń senimdi tiregi. Biz azyq-túlik naryǵynan artyq deldaldardy yǵystyrý úshin bar kúshimizdi salamyz. Fermerlerdi iri saýda ortalyqtaryna múmkindiginshe jaqyndatamyz», dedi kandıdat.
