Kezdesý barysynda jumyspen qamtýmen qatar, azamattardyń nesıe bereshegi týraly máseleler kóterildi. Kandıdattyń málimetinshe, 7,4 mln azamattyń basynda kem degende bir nesıe bar. Jyl saıyn bul kórsetkish artpasa, tómendegen emes. Máselen, sońǵy 12 aıdyń qorytyndysy boıynsha nesıe alǵan otandastarymyzdyń sany 962 myńǵa artqan.
– Bul máseleni turǵyndardyń áleýmettik jaǵdaıyn arttyrý arqyly retteýge bolady. Ol úshin naryqta suranysqa saı mamandyqtardy oqytýdy myqtap qolǵa alǵan jón. Oqý aqysyn sýbsıdııalaý sııaqty qarjylyq problemalardyń da sheshilýi mańyzdy, – dedi Maqsut Nasıbýlov.
Kezdesýde jastardy baspanamen qamtý máselesi de sóz boldy. Elimizdiń baraz óńirinde, sonyń ishinde Almaty qalasynda jastar úshin baspana – eń ózekti másele. Qalada páterdiń baǵasy tym joǵary. Árıne, eńbek jolyn endi ǵana bastaǵan jastar birden páter satyp ala almaıtyny túsinikti. Biraq solaı eken dep esh qareketsiz qol qýsyryp otyrýǵa bolmaıdy. Jastardyń baspana alýyna jan-jaqty jaǵdaı jasaý kerek. Bul – memlekettiń basty mindetiniń biri. Osy oraıda Jalpyulttyq sosıal-demokratııalyq partııasy jergilikti ákimdikter tıimdi tásilder oılastyrýy kerek dep esepteıdi.
– Ákimdik jalǵa beriletin turǵyn-úı salý úshin ınvestorlarǵa tartymdy bolatyn tıimdi tásilderdi oılastyrýǵa tıis. Biraq jaldamaly úıler tym qymbatqa túspeýi kerek. Ondaı páterler, eń aldymen, qoljetimdi bolýǵa tıis. Jalpy, jastar úshin baspanaly bolý qol jetpes armanǵa aınalmaýy kerek. Basynda baspanasy bar jastardyń erteńgi kúnge degen senimi artady. Qalalarda turǵyn-úı tapshylyǵyn azaıtý – asa mańyzdy mindet, – deıdi kandıdat.
Maqsut Nasıbýlov halyqtyń basym bóliginiń kedeıligi týraly máseleni kóterdi. Onyń aıtýynsha, halyqtyń jappaı kedeıligi memleketke óte qymbatqa túsedi. «Bul rette, máseleni sheshý úshin tyń tetikterdi iske qosý mańyzdy», dedi ol.
