Qazaqstan • 26 Aqpan, 2023

Gýmanızm úrdisi

232 ret

kórsetildi

3 mın

oqý úshin

Jaqynda Qazaqstan tájik eline gýmanıtarlyq kómek retinde bes myń tonna mazýt berdi. Osylaısha, Tájikstan Respýblıkasyna 2006 jyldan beri kórsetken gýmanıtarlyq kómektiń jalpy kólemi 44 mln dollardan asty. Jalpy, elimiz birqatar damýshy elge turaqty kómek kórsetip, qoldaý bildirip keledi.

Gúlnar JOLJAN

Syrtqy ister mınıstrliginiń málimdeýinshe, Qazaqstannyń Tájikstandaǵy elshisi Ýálıhan Tórehanov Qazaqstannyń 5 myń tonna mazýtqa arnalǵan resmı gýmanıtarlyq kómek sertıfıkatyn Tájikstan Respýblıkasy Úkimetiniń janyndaǵy Memlekettik materıaldyq rezervter jónindegi agenttiktiń dırektory Nurmahmad Ahmadzodaǵa tapsyrǵan. Elshi óz sózinde Qazaqstan Prezıdenti Q.Toqaevtyń tapsyrmasyna sáıkes eldiń mańyzdy energetıkalyq obektileriniń turaqty jumys isteýi maqsatynda Tájikstanǵa 860 mln 805 myń teńge (shamamen 1,8 mln dollar) somasynda gýmanıtarlyq kómek kórsetý týraly sheshim qabyldanǵanyn aıtty. Sondaı-aq Ýálıhan Tórehanov gýmanıtarlyq kómek energetıkalyq qaýipsizdikti qamtamasyz etýge qosqan úlesi, Qazaqstan men Tájikstannyń ǵasyrlar boıǵy qarym-qatynastaryna tán baýyrlastyq pen ózara kómek kórsetkishi ekenin atap ótti.

О́tken jyldyń birinshi jartysynda da Qazaqstan shet memleketterge 9,4 mln dollarǵa gýmanıtarlyq kómek jibergen edi. Onyń ishinde dári-dármekke – 4,4 mln dollar, azyq-túlik – 280,8 myń dollar, kıim-keshek pen aıaqkıim – 94,8 myń dollar, mashınalar men jabdyqtarǵa – 15,4 myń dollar, basqa da taýarlarǵa 4,6 mln dollar jumsalǵan. Al gýmanıtarlyq kómektiń basym bóligi Aýǵanstanǵa jiberilgen. Onyń qarjylaı somasy 5,7 mln AQSh dollaryn quraıdy. Jalpy, Aýǵanstan – bizdiń elden turaqty kómek alýshy eldiń biri. Odan keıingi orynda Tájikstan tur. 2022 jyldyń birinshi toqsanyndaǵy derek boıynsha bul elge 130,1 myń dollardyń kómegi jóneltilgen. Buǵan qosa, ótken jyly Qazaqstannan Ýkraına, Polsha, Majarstan gýmanıtarlyq kómek alǵan. Ýkraınaǵa jalpy somasy 306 myń dollarǵa 67,7 myń tonna gýmanıtarlyq kómek jiberildi. Al Polshaǵa 3,1 mln dollardy quraǵan 70,7 myń tonna gýmanıtarlyq kómek kórsetildi. Majarstan bolsa 69,5 myń dollar kóleminde 6,7 myń tonna gýmanıtarlyq kómek aldy.

Aıtpaqshy, Qazaqstanǵa da ózge elderden gýmanıtarlyq kómek keledi. 2022 jyly bizge baǵytalǵan kómektiń kólemin Italııa bastap tur, qarjylaı quny 1,7 mln dollar, onan keıingi orynda Qytaı 476,4 myń dollardyń qoldaýyn, Germanııadan 37,4 myń dollardyń kómegin aldyq.