– Bizdiń ulan-ǵaıyr jerimizdi eskersek, Qazaqstan aýmaǵynda birtutas naryq, birtutas ekonomıkalyq keńistik bolýy úshin barlyq óńirlerdi, óndirýshiler men tutynýshylardy baılanystyrý óte mańyzdy. Bul irgeli jumysta negizgi salmaq temirjolǵa túsedi. Búkil QTJ júıesin Eýropa men Azııany baılanystyratyn kópir qyzmetin atqaratyn halyqaralyq kólik-logıstıkalyq kompanııaǵa aınaldyrý jobasy ázirlenip jatyr. Qytaı men Batys arasyndaǵy konteınerlik tasymal kóleminiń ósip kele jatqany da kezdeısoq emes, – dedi partııa jetekshisi jumysshylarmen kezdesýde.
Kezdesý barysynda Azat Perýashev partııanyń saıası baǵdarlamasynyń alty negizgi baǵytyn atady: Táýelsizdik jáne «Alash» ulttyq ıdeıasy, demokratııa jáne parlamentarızm, sybaılas jemqorlyqpen jáne deofshorızasııamen kúres, áleýmettik ádilettilik, naryqtyq ekonomıka, kásipkerlik pen otandyq óndirýshilerdi qoldaý, salıqaly syrtqy saıasat.
Kompanııa qyzmetkerleri Kóliktik servıs ortalyǵy olıgopolııasyna qatysty máselelerdi kóterdi. Partııa basshysy 2017 jyldan beri «Aq jol» fraksııasy kirme joldardy reıderlik basyp alý men «Kóliktik servıs ortalyǵy» AQ-nyń tarıfterdi kúrt kótergeni týraly birneshe ret depýtattyq saýal joldaǵanyn eske saldy. Biraq tek prezıdent Q.Toqaevtyń tikeleı tapsyrmasynan keıin ǵana monopolııasyzdandyrý jónindegi úkimettik komıssııa joldardy zańdy ıelerine qaıtarýǵa qol jetkizip, vagondardyń ótý tarıfterin 12 esege tómendetti.
Depo jumysshylary ıpotekanyń qoljetimdiligi, nesıeler boıynsha aqylǵa qonymsyz paıyzdar, jalǵyz baspananyń bankter men kollektorlardan qorǵalýy máselelerine qyzyǵýshylyq tanytty. Osy oraıda A.Perýashev «Aq jol» partııasynyń jeke tulǵalardyń bankrottyǵy týraly zań qabyldaý jolyndaǵy 8 jyldyq kúresi, sol zań aıasynda boryshkerlerge jasalǵan múmkindikter men shekteýler týraly aıtty.
