Is-shara Almaty oblysynyń Eńbekshiqazaq aýdanyna qarasty Qaınazar aýylynda uıymdastyryldy. Kandıdattar, partııa belsendileri jáne aýyl turǵyndary aýyl mańyndaǵy taýǵa shyǵyp, memlekettiń jáne partııa týyn ornatty.
Jergilikti turǵyndarmen kezdesýde kandıdat Irına Álimjanova zeınetaqysynyń 80 paıyzyn nesıe tóleýge jumsap otyrǵan qarttar bar ekenin aıtty. Bul rette ol turǵyndardyń áleýmettik jaǵdaıyn jaqsartýdyń tyń tetikterin oılastyrý qajet ekenin alǵa tartty.
– Elimizde nesıege «baılanǵan» adam kóp. Negizinde halyqtyń nesıelený deńgeıi ekonomıkalyq ósimmen qatar júrýi kerek edi. Al halyqtyń bank aldyndaǵy qaryzy ekonomıkalyq ósimnen asyp túsken. Ulttyq bank júrgizgen saýaldama nátıjesi ekonomıkalyq belsendi nemese kishigirim qyzmette júrgen azamattardyń 90 paıyzy tek aılyqpen kún kóretinin kórsetken. Demek qazir jurtshylyqtyń qaryzsyz ómir súrýi barynsha shektelgen. Nesıe rásimdegen kezde qaryz alýshynyń tólem qabileti, tabysy eskeriletini belgili. Soǵan qaramastan bir adamnyń bir mezgilde birneshe nesıeni qatar alýy tyıylmaı otyr. Sarapshylardyń dereginshe, Qazaqstandaǵy jumys isteıtin halyqtyń 70 paıyzy qaryzben ómir súredi. Nesıeni shekteý máselesimen naryqtyń jaǵdaıyn jaqsarta almaımyz. Bank sektory tájirıbesinde halyqty nesıege baılap qoıýdyń túrli ádisi bar. Bankter qaryz alýshynyń qaryz júktemesi normatıvke sáıkes bolsa, ózge banktegi nesıesin qaıta qarjylandyrý arqyly nesıesin jańarta berýge, sol arqyly qaryz qamytyn qalyńdata berýge jol ashyp qoıǵan. Eger quzyrly oryndar jaǵdaıdy rettep otyrmasa, máselege qarjy, munaı treıderleri tárizdi «nesıe treıderleri» aralasyp ketýi múmkin. Mundaı jaǵdaıda qaryzǵa batqan halyqtyń áleýmettik jaǵdaıy ýshyǵyp ketedi. Halyq qaryzsyz bolýy úshin olardyń tabysy ósýi kerek, – deıdi kandıdat.
