Otyrysqa qatysqan zııaly qaýym ókilderi men sarapshylar elimizde júrgizilgen qoǵamdyq-saıası reformalardyń nátıjelerin talqylady. Sondaı-aq Ádiletti Qazaqstan jáne ıntellektýaldy ult qalyptastyrý barysyndaǵy ulttyq qundylyqtardyń róline keńinen toqtaldy. Dıalog alańynyń jumysyn bastaǵan Máýlen Áshimbaev elimizde Memleket basshysy Qasym-Jomart Toqaevtyń bastamasymen aýqymdy reformalar júrgizilip jatqanyn atap ótti. Sondaı-aq ol Konstıtýsııaǵa engizilgen ózgerister Ádiletti Qazaqstan qurý jolyndaǵy mańyzdy qadamdar bolǵanyn tilge tıek etti. Senat tóraǵasy zań shyǵarý salasyndaǵy jańashyldyqtarǵa da nazar aýdardy. Sonyń aıasynda búginde Senat óńirlerdiń múddesin qorǵaıtyn Palata retinde qalyptasyp jatqany belgili.
– Ádiletti Qazaqstan degenimiz – birinshi kezekte, barlyq salaǵa ádilettilik qaǵıdatyn engizý. Osy baǵyttaǵy ortaq maqsattarǵa qol jetkizý úshin memlekettik ınstıtýttar men azamattyq qoǵamnyń kúshin biriktirip, ár iste ulttyq múdde turǵysynan saralap áreket etý asa mańyzdy. Búgingideı syndarly kezeńde ultty uıytatyn ortaq qundylyqtardy dáripteýdiń bereri mol dep esepteımiz, – dedi Máýlen Áshimbaev.
О́z sózinde Palata spıkeri negizgi jáne halyqtyń múddesi men búgingi suranystaryna saı keletin qundylyqtar jóninde aıtty.
– Búgingi taqyryp týraly sóz qozǵaǵan kezde «bizdiń ortaq qundylyqtarymyz qandaı?» degen zańdy saýal týyndaıdy. Bul turǵyda árkim ártúrli kózqaras ustanýy múmkin. Biraq negizgi qaǵıdalar boıynsha bárimizdiń pikirimiz bir jerden shyǵady dep oılaımyn. Bizdiń qoǵamdy Táýelsizdik, ádilettilik, tatýlyq, bilim, eńbek jáne ózara jaýapkershilik sııaqty qundylyqtar biriktiredi, – dedi Máýlen Áshimbaev.
Sonymen qatar otyrys barysynda ortaq qundylyqtardy dáripteýdiń tetikteri týraly da sóz boldy. Qatysýshylar ulttyq múddege taban tireıtin durys qundylyqtardy óskeleń urpaqqa, jastarǵa nasıhattaý kezinde júıeli jumys júrgizý jáne tıimdi jolyn tabý asa mańyzdy ekenin aıtty. Odan bólek, medıasarapshylar men kreatıvti ındýstrııanyń ókilderi kontentterdiń jańa úlgisin jáne olardy taratýdyń zamanaýı tásilderin usyndy.
Máýlen Áshimbaev talqylaý barysynda aıtylǵan usynystardyń bári Senattyń aldaǵy jumysynda eskeriletinin jetkizdi.
– Ádiletti Qazaqstan qurý bastamasy eldigimiz ben egemendigimiz úshin asa mańyzdy qadam. Ony iske asyrý tek memlekettiń ǵana mindeti emes. Bul – búkil ult bolyp jumylatyn mańyzdy mindet. Osy jolda ortaq qundylyqtardy qalyptastyryp, olardy dáripteýdiń utymdy, zamanaýı tetikteri men formalaryn tabýdyń máni zor. Bul baǵytta zııaly qaýym, ǵalymdar, memlekettik organdar, kreatıvti ındýstrııa men óner salasynda qyzmet etip júrgen azamattar, qoǵamdyq uıymdar birlesip, bárimiz birge nátıjeli eńbek etemiz dep senemin, – degen Senat tóraǵasy barsha qatysýshylarǵa belsendilik tanytqandary úshin alǵys bildirdi.
Dıalog alańynyń otyrysyna senatorlarmen birge memleket jáne qoǵam qaıratkeri Darhan Myńbaı, Ulttyq sport qaýymdastyǵynyń prezıdenti Islambek Saljanov, «Bilim Media Group» kompanııasynyń dırektory Raýan Kenjehanuly, medıasarapshy Maqpal Jumabaı, mýltıplıkator, halyqaralyq kınofestıvalderdiń laýreaty Saqıolla Qasıet taǵy basqa sarapshylar qatysty.
Talqylaýda medıasarapshy Maqpal Jumabaı mádenı kreatıv ındýstrııasyn damytýǵa qatysty óz usynystaryn ortaǵa saldy.
– Elimizdegi kreatıv ındýstrııanyń basym baǵyty bolyp otyrǵan IT salasyn mádenı kreatıv ındýstrııadan ajyrata bilý qajet. Qazir IT salasyn damytýdaǵy ozyq tájirıbelerdi kreatıv ındýstrııaǵa qoldaný arqyly ony barynsha jyldam damytýǵa múmkindik bar. Sátti júzege asyrylǵan IT habtar tájirıbesiniń negizinde kreatıv habtardy damytý usynysy bar. Kreatıv hab degenimiz shyǵarmashylyq jáne zııatkerlik áleýeti aıqyn kórinetin óner mamandary shoǵyrlanyp, qaıtalanbas ıntelllektýaldyq týyndylar jasaıtyn, qoǵamdy rýhanı órkendeýge bastaıtyn kreatorlardyń tamyr jaıatyn jeri. Bul jerde adamzatqa ortaq mádenı qundylyqtar ómirge keledi, – dedi óz sózinde medıasarapshy.
