Yqpaldastyqty arttyrý jolynda

Parlament Májilisinde palata Tóraǵasy Qabıbolla Jaqypov pen Iordanııa Parlamenti Senatynyń Spıkeri Abdýr-Raýf Raýabde kezdesip, parlamentaralyq ynty­maqtastyqty odan ári nyǵaıtý bolashaǵyn talqylady, dep habarlady Májilistiń baspasóz qyzmeti. Taraptardyń, pikirinshe eki el basshylarynyń turaqty kezdesýleri qos el yqpaldastyǵynyń damýyna serpin berip, búgingi kúni ózara dostyq jáne berik áriptestik ornaǵan. Májilis Spıkeri Taıaý Shyǵysta turaq­tylyq pen beıbitshilikti qamta­masyz etýde atalǵan memleket rólin jo­ǵary baǵalaı kelip, Iordanııanyń áleýmettik-ekonomıkalyq jáne saıası reformalar jolyndaǵy jetistikterine toqtaldy. Qabıbolla Jaqypov Qazaqstan Prezıdenti Nursultan Nazarbaevtyń halyqaralyq bastamalaryna, onyń álemde beıbitshilikti qamtamasyz etý­degi mańyzdylyǵyna  aıryqsha nazar aýdara kelip: – Osy rette ıordanııalyq taraptyń ıad­rolyq qarýdy taratpaýǵa qatysty qazaqstandyq bastamalarǵa kórsetip jat­qan qoldaýyn óte joǵary baǵa­laımyz. Sondaı-aq, Iordanııa Koroli Abdalla II-niń Taıaý Shyǵysta ıadrosyz aımaq qurý jolyndaǵy ıdeıasyn qoldaımyz, – dedi. Abdýr-Raýf Raýabde óz kezeginde Elbasy Nursultan Nazarbaevtyń basshylyǵynyń nátıjesinde qol jetkizilgen bizdiń elimiz damýyna jo­ǵa­ry baǵa berdi. Sondaı-aq, Spıker Ortalyq Azııa aımaǵyndaǵy Qazaq­stannyń mańyzdy róline toqtaldy. Odan ári Q. Jaqypov óz áriptesin 2014-2015 jyldarǵa arnalǵan BUU Qaýipsizdik Keńesiniń turaqty emes múshelerin saılaýda Iordanııa memleketiniń jeńiske jetýimen quttyqtap, jańa tabystar tiledi. Májilis Tóraǵasynyń atap ótkenindeı, Iordanııa – Qazaq­stan­nyń Taıaý Shyǵystaǵy jaqyn odaq­tas­tarynyń biri. Sondyqtan, bizdiń elimiz aldaǵy ýaqytta da ekijaqty saýda-ekonomıkalyq, mádenı-gýmanıtarlyq, sondaı-aq, parlamentaralyq ózara is-qımyldy kúsheıtýge nıetti. – Biz ıordanııalyq áriptesterimizben beıindi komıtetter deńgeıinde yq­pal­dasýǵa daıynbyz. Jáne bizdiń parla­mentterimiz arasynda yntymaqtastyq jónindegi top qurý da mańyzdy bolyp tabylady, – dedi Q.Jaqypov.