Senat bıýrosy kún tártibin bekitti

Qasym-Jomart Toqaevtyń tóraǵalyq etýimen Senat bıýrosynyń otyrysy boldy, dep habarlady osy palatanyń baspasóz qyzmeti. Joǵarǵy palatanyń 26 maýsymda bolatyn kezekti otyrysynyń kún tár­tibi qaraldy. Senat otyrysyna «Dene­shy­nyqtyrý jáne sport týraly» zań­namaǵa deneshynyqtyrý jáne sport máseleleri boıynsha ózgerister men to­lyqtyrýlar engizý týraly ilespe zań jobasy shyǵarylatyn boldy. Depýtattar, sondaı-aq, keıbir zańnamalyq aktilerge Qazaqstan Respýblıkasynyń poshta týraly zańnamasynyń normalaryn Dúnıejúzilik poshta odaǵy aktileriniń normalarymen birizdendirý máseleleri boıynsha túzetýler engizý týraly zań jobasyn qaraıdy. Kún tártibine odan basqa halyqaralyq qujattardy ratıfıkasııalaý týraly bes zań jobasy engizildi. Bas komıtetterdiń tóraǵalary zań jobalarynyń Senat otyrysyna ázirlik barysy týraly baıandady. Bıýroda, sondaı-aq,  taıaýda Májilisten túsken zań jobalary bólinip berildi. Palata Tóraǵasy Q.Toqaev Parla­mentaralyq Assambleıanyń damýyna belsendi qatysqany jáne Táýelsiz Memleketter Dostastyǵyna qatysýshy elder halyqtary arasynda dostyqty nyǵaıtqany úshin TMD PAA-nyń qurmet gramotalaryn senatorlar Ermek Jumabaev pen Vladımır Bobrovqa tabys etti. Senattyń birqatar depýtattary «Nur Otan» partııasynyń jańa úlgidegi bıletterine ıe boldy. Bıýro, sondaı-aq, Astana, Almaty qalalary men elimizdiń oblystary más­lıhattarynyń  bir top depýtatyn «Qazaqstan Respýblıkasy máslıhattarynyń 20 jyldyǵyna oraı jáne otandyq quqyqtyq júıeni jetildirýge baǵyttalǵan qyzmeti úshin» Parlament Senatynyń Qurmet gramotasymen marapattaý týraly qaýly qabyldady. Oblystyq, qalalyq jáne aýdandyq máslıhattardyń depýtattaryn qosqanda 63 adam Senat nagradasyn alatyn boldy.