Parlamentaralyq baılanystar jaıy qaraldy

Parlament Senatynyń Tóraǵasy Qasym-Jomart Toqaev Qazaqstanǵa resmı saparmen kelgen Iordan Hashımıt Koroldigi Parlamenti Senatynyń Tóraǵasy Abdýr-Raýf Salem Raýabdemen kelissóz júrgizdi, dep habarlady Senattyń baspasóz qyzmeti. Joǵary mártebeli meımanmen kezdesý kezinde Q.Toqaev bul sapar ekijaqty yntymaqtastyqqa jańa serpin beretinine jáne parlamentaralyq baılanystardy nyǵaıta túsetinine senim bildirdi. Júzdesýshiler eki eldiń dostyq jáne ózara tıimdi qatynastaryn damytýdaǵy Qazaqstan Prezıdenti Nursultan Nazarbaev pen Iordanııa Koroli Abdalla II-niń erekshe rólin atap óte kelip, oǵan ıordan monarhynyń taıaýdaǵy Astanaǵa sapary dálel ekenin aıtty. Taraptar parlamentaralyq baılanystardy nyǵaıtýǵa ýaǵd­alasty, ol úshin Qazaqstan men Iordanııa se­nat­tarynda par­lamentaralyq dostyq toptary jetekshileriniń keńesýleri bolady. Qazaqstan Parlamenti joǵary pala­tasynyń Tóraǵasy álemdegi damyǵan 30 eldiń qataryna kirýdi kózdeıtin «Qa­zaqstan-2050» Damý strategııasy týra­ly áńgimeledi. «Qazaqstan búgingi tańda tabıǵı baılyqtardyń ǵana emes, eń aldymen, Prezıdent N.Nazarbaev udaıy júrgizip ke­le jatqan júıeli refor­malar­dyń arqasynda burynǵy keńes­tik keńistiktegi eń damy­ǵan elderdiń biri bolyp tanyl­dy»,  dedi Q.Toqaev. Ol Qazaq­stan basshysynyń atyna Am­man qalasynda kóshe bergeni úshin Iordanııa tarapyna rıza­shy­lyǵyn bildirdi. Senat basshysy Qazaqstan Par­­la­mentiniń qurylymy jáne qyzmetimen, elimizdiń syrtqy saıasatymen, sondaı-aq, Ortalyq Azııadaǵy ahýalmen tanys­tyrdy. Iordanııa Senatynyń Tóraǵasy óz kezeginde sońǵy jyldarda óziniń elinde júzege asyrylyp jatqan saıası reformalar jáne adamı kapıtaldy damytý sharalary, medısınalyq týrızm salasyndaǵy Iordanııa jetistikteri týraly áńgimeledi. Ol, sondaı-aq, Taıaý Shyǵystaǵy jaǵdaı jáne jaqyn elderdegi qaqtyǵystar men daǵdarystardy bastan keshken bosqyndardyń aǵylýyna baılanysty Iordanııadaǵy gýmanıtarlyq ahýal týraly oılaryn ortaǵa saldy. Onyń aıtýynsha, kóshi-qon  saldarynan el halqynyń 20 paıyzy shamasyn kóship-qonýshylar qurap otyr. Kezdesý qorytyndysy boıynsha jýrnalıstermen kezdesýde Abdýr-Raýf Salem Raýabde óziniń sapary týraly áserlerimen bólisti. «Biz buryn Qazaqstan týraly kitaptardan oqyp, buqaralyq aqparat quraldarynan bilgen bolsaq, búgin sizderdiń elderińizdiń jetistikterin kózben kórdik ári joǵary baǵalap otyrmyz. Sizder qazirgi zamandaǵy memleket qura aldyńyzdar jáne qorshaǵan ortamen izgi nıetti qarym-qatynastar ornata aldyńyzdyr. Onyń bári Prezıdent N.Nazarbaevtyń dana basshylyǵynyń, Úkimettiń jáne Qazaqstannyń qarapaıym halqynyń kúsh-jigeriniń arqasynda jasaldy», dedi ol. Onyń aıtýynsha, «Iordanııa Qazaqstandy Eýropa men Azııanyń qaqpasy retinde qarastyrady, dál sol sııaqty Qazaqstan da Iordanııany Taıaý Shyǵys aımaǵynyń qaqpasy retinde qarastyra alady». Iordanııa Parlamenti delegasııasynyń sapary 27 maýsymǵa deıin sozylady. Sapar barysynda Astana, Almaty jáne Býrabaıda kezdesýler men sharalarǵa qatysý kózdelgen.