Kezdesý ashyq pikirtalas formatynda ótti. Is-sharaǵa ortalyq memlekettik organdardyń, Dúnıejúzilik banktiń, azamattyq qoǵam men ǵylymı ortanyń ókilderi qatysty. Jıynda kómirtegi beıtaraptyǵyna qol jetkizý strategııasynyń jol kartasy talqylandy. Atap aıtqanda memlekettik saıasat, aldaǵy sharalar jáne ınvestısııalardy tartý máseleleri qozǵaldy.
Ulttyq ekonomıka mınıstri Álibek Qýantyrov óz sózinde atap ótkendeı, Qazaqstannyń 2060 jylǵa deıingi kómirtegi beıtaraptyǵyna qol jetkizý strategııasy ekonomıkanyń negizgi sektorlaryn qamtıdy. Sondaı-aq ol parnıktik gazdar shyǵaryndylaryn qysqartý, energııa tıimdiligin arttyrý jáne jańartylatyn energııa kózderin damytý boıynsha mańyzdy baǵyttardy aıqyndaıdy.
«Bizdiń maqsatymyz – kómirtegi izin azaıtý, ekonomıkanyń turaqty ósýi, densaýlyq saqtaý salasyn jaqsartý jáne klımattyq táýekelderdi azaıtýdyń jańa artyqshylyqtaryn paıdalaný. Tómen kómirtekti tehnologııalarǵa arnalǵan taza ınvestısııalar kólemi $610 mlrd-qa baǵalanýda. Bul jańa naryqtardyń paıda bolýyna jáne otandyq óndirýshiler úshin jumys istep turǵan naryqtardyń keńeıýine yqpal etip, jańa jumys oryndaryn qurýdy yntalandyrady», dep atap ótti ol.
Onyń aıtýynsha, qajetti ınvestısııanyń jartysynan astamy nemese $386,3 mlrd – bul ekonomıkadaǵy qoldanystaǵy jáne aınalymdaǵy ınvestısııalar. Iаǵnı shıkizat salasynan ekonomıkanyń «jasyl» sektorlaryna qaıta baǵdarlanatyn bolady. Qalǵan $223,7 mlrd jańa ınvestısııalyq resýrs bolady.
Investısııalardy tartý, jańa mamandyqtar qurý, tájirıbe almasý úshin Qazaqstan halyqaralyq uıymdarmen jáne basqa eldermen yntymaqtastyqty nyǵaıtýǵa nıetti.
«Bizdiń aldymyzda qoǵamdyq densaýlyqty jaqsartý, energetıkalyq qaýipsizdik pen turaqty ekonomıkalyq ósý boıynsha úlkent mindet tur. Úkimet osy maqsattarǵa qol jetkizý úshin josparly jumys júrgizýde», dedi vedomstvo basshysy.
