Jelidegi ekinshi jol iske qosylǵannan keıin telimniń ótkizý qabileti 5 ese artady deıdi mamandar. Qazir táýligine 12 jup júk poıyzyn ótkizip otyrǵan bolsa, ekinshi jeli paıdalanýǵa berilgende olardyń sany táýligine 60 jup júk poıyzyna deıin kóbeıedi. Buǵan deıin aıtylǵandaı, joba óte tıimdi mýltıplıkatıvti áserge ıe. 20 jyl ishinde ol Ulttyq qorǵa 543 mlrd teńgeni ústeme paıyzymen qaıtarady. Sondaı-aq bıýdjetke 4 trln teńgeden astam salyq túsimderin qamtamasyz etedi. Qurylysty júrgizý barysynda qazaqstandyq qamtý úlesi 85 paıyzdy qurap otyr.
Qurylys jumystaryn uıymdastyrý úshin Balqash stansasy, Jaqsybulaq, Úsharal qalasy boıynsha úsh basqarý ortalyǵy iske qosylǵan. Bularmen birge Jaryq, Saryqum, Ortaderesin, Sholqyzyl, Jaqsybulaq, Aqtoǵaı, Úshtóbe, Saıqan stansalarynda 8 óndiristik baza qurylyp, jumys istep tur. Taǵy bir quptarlyǵy qazaqstandyq zaýyttarmen ınertti materıaldar, temirbeton shpaldar jáne basqa da buıymdardy jetkizip alý boıynsha kelisimsharttar jasalypty.
Osy kúnde Moıynty-Balqash teliminde jumystar júrgizilip jatyr. Kókdambaq-Saryqum aralyǵyna jer tósemi tóselgen. 80 shaqyrym bolatyn bekitkishteri bar shpaldar jetkizilip, 62 shaqyrymdyq relsti shpal torlary tóseýge daıyn.
Qurylys alańynda 125 birlik arnaıy tehnıka jáne 200-ge jýyq qyzmetker jumys isteıdi. Jer tósemin salý jáne rels-shpal toryn tóseý úshin qosymsha 6 tóseý poıyzyn jáne 8 hopper-mólsherlegishin tartý josparlanǵan.
