Músindi Aıbek Ospanov esimdi Kegen aýdanynyń turǵyny taýyp alǵan. Ol osydan tórt jyl buryn Qumtekeıdegi ıen daladan traktorymen úıine qum basyp alyp keledi. Qumdy úıiniń mańyna ákelip tókkende arasynan osy tas músin shyqqan.
Sol ýaqyttan beri úıinde turǵan erekshe jádigerdi aýyl turǵyny qystyń sońǵy kúni ǵana – 28 aqpanda aýdandyq tarıhı-ólketaný mýzeıine ótkizgen. Kegen aýdandyq tarıhı-ólketaný mýzeıiniń ǵylymı qyzmetkeri Merýert О́rjigitovanyń aıtýynsha, tas músinniń bıiktigi – 38, eni – 35 sm. Salmaǵy – 26, 929 keli eken.
Erekshe eksponattyń Qumtekeıden tabylýy da beker emes. Ǵalymdardyń aıtýynsha, qalyń qum basyp ketse de qalashyq ejelden iri bolǵan. «Qumtekeı, ıaǵnı Qumtókeı degen ataýdyń ózi tarıhı mekendi qum basqannan keıin paıda bolýy ábden múmkin. Muny ǵalymdar da joqqa shyǵarmaıdy. Kóptegen zertteý jumysynda bul meken Úısin memleketiniń astanasy Chygý qalasy dep kórsetiledi. Biraq keıinnen qala kúırep, eldi mekenniń barlyǵyn qum basyp qalǵan», deıdi Merýert О́rjigitova.
Úısin qalalarynyń biri bolǵan bul mekenniń qoınaýy tarıhı qundy jádigerlerge toly. Al mýzeı qyzmetkerleri «tylsym tas zertteýdi qajet etedi» deıdi. Qazirgi tańda Almaty oblystyq mýzeıler birlestigi, Sh.Ýálıhanov atyndaǵy Tarıh jáne etnologııa ınstıtýty jáne Esik arheologııalyq ólketaný mýzeıi kelissózder júrgizip, tas músinge tyńǵylyqty zertteý júrgizý máselelerin pysyqtaýda.
