«2023 jyly dándi jáne dándi burshaqty daqyldar – 398,2, maıly daqyldar – 72,2, qant qyzylshasy – 10,4, kartop – 11,8, kókónis pen baqsha daqyldary – 61,7, mal azyǵy 216,7 myń gektar alqapqa egiledi dep josparlap otyrmyz. Kóktemge dala jumystaryna qajetti 90,2 myń tonna tuqymnyń 68,9 myń tonnasy daıyndalǵan. Naqtyraq aıtar bolsaq, qorda qajetti tuqymnyń 76,4 paıyzy bar. Buǵan qosa qant qyzylshasynyń, dándik júgeri, kartop, súrlemdik júgeri jáne kúnbaǵys daqyldarynyń tuqymyn shet memleketterden, Almaty, Qaraǵandy, Pavlodar jáne Jetisý oblystarynan jetkizemiz», deıdi basqarma basshysy.
N.Jigitekovtiń aıtýynsha, kóktemgi dala jumystaryn ýaqtyly úılestirý úshin sharýa qojalyqtaryn 15,5 myń tonna kepildendirilgen dızel otynymen qamtý josparlanǵan. Búgingi tańda qajetti dızel otyny janarmaı quıý beketterindegi arnaıy operatorlar arqyly sharýalarǵa tómen baǵamen ótkerilýde. Sondaı-aq bıyl 280 myń gektar alqapqa 54 myń tonna tyńaıtqysh paıdalanylmaq.
«Basqarma tarapynan sharýalarǵa qajetti jumystar atqarylyp jatyr. Sharýashylyq basshylary 50 paıyz qarajatty óz esebinen, qalǵan 50 paıyz qarjyny sýbsıdııa esebinen jabýy úshin «QazAzot» JShS jáne «Qazfosfat» JShS-y zaýyttarmen memorandým jasalǵan. Memorandým negizinde oblys sharýashylyqtarynyń egin naýqanyndaǵy otandyq tyńaıtqyshtarǵa degen qajettiligi men suranysy qamtamasyz etiledi», deıdi N.Jigitekov.
Kóktemgi dala jumystaryna daıyndyq barysy óńir basshysy Nurjan Nurjigitovtiń de nazarynan tys qalmaq emes. Onyń aıtýynsha, dıqandardyń alańsyz jumys isteýine barlyq tarap jan-jaqty jaǵdaı qarastyrýy qajet.
«Sharýa qojalyqtaryna operatorlar tarapynan bólingen dızel otyny aı saıyn tıisti deńgeıde úlestirilip otyrýy kerek. Ol Úkimet belgilegen jeńildetilgen baǵamen berilýge tıis. Bul jumysty tikeleı baqylaımyz. Qazir memleket tarapynan aýyl sharýashylyǵy salasyna kóp kóńil bólinip jatyr. Bıyl qant qyzylshasy alqabyn birneshe esege ulǵaıtý týraly sheshim qabyldadyq. Qysqasy, óńirde tátti túbirdi ósirýdiń tıimdi ekenin bárimiz túsinip otyrmyz. Sharýalardyń da jumysqa belsene kiriskeni kóńil qýantady. Baltamyr kólemin arttyrý boıynsha sharýa qojalyqtar arasynda túsindirý jumystaryn toqtatpaımyz. Byltyr aýyl sharýashylyǵy qurylymdaryna 60 mlrd teńgege qoldaý kórsetilgen bolsa, bıyl onyń kólemi 100 mlrd teńgege ulǵaıyp otyr. Sonymen qatar bir eskeretin másele, egis alqaptaryna aǵyn sý jetkizý úshin qojalyq jetekshileri «Qazsýshar» mekemesimen kelisimshartqa otyrýy kerek. Atalǵan mekeme egis alqabyna sý jetkizip berýdi mindetine alǵan jaǵdaıda ǵana ol alqaptarǵa sýarmaly daqyldardy ornalastyrýǵa ruqsat beriledi», deıdi N.Nurjigitov.
Qysqasy, jambyldyq dıqandar kóktemgi egis jumystaryna tas túıin daıyn sekildi. Salalyq basqarma basshysy sharýalardyń jumysqa qarqyndy túrde kirisýi úshin qoldan kelgen kómekti aıamaıtynyn aıtyp otyr. Qojalyq basshylaryna da keregi sol emes pe?
Keıingi jyldary óńirde qant qyzylshasyn ósirýge aıryqsha basymdyq berilgeni ras. Sharýa qojalyǵynyń basshylary da baltamyr alqabyn ulǵaıtýǵa nıetti. Bul baǵyttaǵy jumystar aldaǵy jyldary da basymdyqqa ıe bolatyn sııaqty.
Jambyl oblysy
