Sportty damytý dıreksııasynyń baspasóz qyzmeti taratqan málimet boıynsha, el qorjynyna alǵashqy altyndy shańǵymen tuǵyrdan sekirý sportynyń ókili Ilıa Mızernyh saldy. K-40 (60 metr bıikten) sanatyndaǵy tramplınnen sekirýde 239,3 upaı jınaǵan otandasymyz qarsylastarynan oq boıy uzap, tuǵyrdyń eń bıik satysyna kóterildi. Sonymen qatar dál osy sanatta jarys jolyna shyqqan taǵy bir jerlesimiz Ilıa Shılnıkov attasynan 12 upaı az jınap, 227,3 upaımen kúmis medaldi moınynda jarqyratty. Qola medal Qıyr Shyǵys federaldy aımaǵynan kelgen Dmıtrıı Seregınge buıyrdy.
Qyzdar arasyndaǵy saıysta otandasymyz Sofıa Shıshkına úzdik úshtiktiń qatarynan kórinip, qola medalge qol jetkizdi. Bul saıysta Oral federaldy aımaǵynyń sportshysy top jarsa, Belarýs ókili Eva Bedrıskaıaǵa kúmis júlde buıyrdy. Bir aıta keterligi, osydan tórt jyl buryn, ıaǵnı 2019 jyly Ońtústik Sahalınde ótken alǵashqy «Azııa balalary» oıyndarynda Sofıanyń ápkesi Veronıka Shıshkına shańǵymen tuǵyrdan sekirýde juldyzy janǵan edi. Osylaısha, tórt jylda bir otbasynyń eki ókili bıik tuǵyrdan kórinip otyr.
Ilıa Mızernyh pen qola júldeger Sofıa Shıshkına aqpan aıynyń basynda Alataý baýraıynda ótken IV qysqy Jastar sport oıyndarynda K-60 tramplıninde jeńiske jetken edi. Al Alıona Sverıdenko (ShQO) qola júldeni qorjynǵa salǵan.
Sondaı-aq «Azııa balalary» II qysqy oıyndaryna qatysyp jatqan short-trekshilerimiz de jarap tur. Muz ústinde oıqastaǵan jerlesterimiz tórt júlde jeńip aldy. Erler arasyndaǵy jekeleı synda Meıirjan Tólegen 1 500 metrge júgirýde máre syzyǵyn ekinshi kesse, Malıka Joltabar dál osy qashyqtyqtaǵy qyzdar saıysynda qola júldeni qanaǵat tutty.
Al estafeta saıysynda (3 myń metrge) quramynda Álibı Álimgereev, Madııar Madıhov, Erasyl Shyńǵyshan men Meıirjan Tólegen syndy elimizdiń eń úzdik short-trekshileri bar Qazaqstannyń erler quramasy kúmispen kúptelse, Nurııa Alpysbaı, Aızada Altynbek, Aısara Labıb pen Malıka Joltabardan quralǵan qyzdarymyz 3 myń metrge júgirýde úshinshi boldy.
Qazaqstan delegasııasy jalpykomandalyq esepte 1 altyn, 3 kúmis, 3 qolamen 7-orynǵa jaıǵasty. Máskeý qalasynyń sportshylary (9 altyn, 2 kúmis, 4 qola) birinshi orynda kele jatsa, keıingi satylarǵa Oral (3 altyn, 4 kúmis, 3 qola) men Qıyr Shyǵys federaldy aımaǵy (3 altyn, 2 kúmis, 3 qola) ornalasqan.
