Kollajdy jasaǵan Záýresh SMAǴUL, «EQ»
«Atyńnan aınalaıyn Áýlıeata, atyńdy ap qoıdy dep bolma qapa», dep jyrlaǵan Jambyl aqyn atyndaǵy óńirdiń halqy jarytymdy jalaqy almaıtynyn aıtyp qapa bolyp júr. Dotasııalyq óńir bolǵan soń ba, álde basqa bir sebebi bar ma, kim bilsin... Sońǵy birneshe aıdyń bederinde óńir turǵyndarynyń birazynyń júıkesi syr bere bastaǵan syńaıly.
Byltyrdan beri Jambylda jurt nege dúrlige beretin boldy degen saýalǵa bas aýyrta bastadyq. Sebebi men saldaryna úńilip kóreıik. Á degende «Qazfosfat» JShS-indegi eńbek daýy eske oralady. Qarly qarashada sol kezdegi seriktestiktiń sıfrly transformasııa basqarmasyn basqarǵan Oleg Kýlıkovtyń dóreki sózi jumysshylardyń júıkesine shı júgirtti. Sońy eńbek daýyna ulasty.
Ras, O.Kýlıkov artynsha-aq qyzmetinen ketti. Osy bir oqıǵa der kezinde seriktestiktegi biraz máseleniń betin ashty. Qyzmetkerler is-qaǵazdyń memlekettik tilde júrgizilýinen bastap, emdelýge beriletin tólemaqyny qalpyna keltirý, kásibı kıimmen qamtamasyz etý, 15 shaǵyn aýdannan jáne qala irgesindegi eldi mekenderden jumysshylardy sapaly qoǵamdyq kólikpen qamtý, qyzmetkerlerdiń sanyn arttyrý, ekinshi aglomashınaǵa qarajat bólý sekildi máselelerdi kóterdi. Uzyn sany 13 pýnktten turatyn talapty jaýapty basshylar qadaǵalaýyna alǵan.
Iá, «Qazfosfat» dese 7 myńǵa jeteǵabyl azamatty jumyspen qamtyp otyrǵan, elimizdegi hımııa ónerkásibiniń lokomotıvi sanalatyn seriktestik birden oıǵa oralady. Munda myńdaǵan adam eńbek etip jatqanyn eskersek, seriktestiktegi árbir usaq másele ýaqyt óte kele irilenetinin, sońy eńbek daýyna ákelip soǵatynyn ilki sátke de umytpaǵan durys-aý.
Kún saıyn bolmasa da, aı saıyn jalaqy máselesin alǵa tartqan áleýmettiń áýelgi talaby aldymyzdan shyǵyp jatady. 2022 jyl jabylar tusta «Taraz lokomotıv jóndeý deposy» ujymynyń qyzmetkerleri «Aılyq kóterilsin!» degen uranmen bas kóterdi.
Jalaqysynyń jyrtyqty jamaýǵa jetpeıtinin jaıyp salǵan jurttyń bazynasy túsinikti. Sońǵy birneshe jyldyń bederinde jalaqyǵa mardymdy soma qosylmaǵanyn aıtqan jumysshylardyń ýájin tyńdaǵandar máseleni ońynan sheshýge ýaǵdalasty.
«Anyǵyn aıtsaq, shydamnyń da shegi bar. Biz jalaqynyń kóterilgenin jyl basynan beri saryla kútip júrmiz. Olar 7-10 paıyz qosyldy degendi alǵa tartady. Alaıda ózgergen túk joq. Bári báz-baıaǵy qalpynda», dep áriptesteriniń janaıqaıyn jetkizgen «Taraz lokomotıv jóndeý» deposynyń jumysshysy Danııar О́mirbaevtyń daýsy qulaǵymyzdan keter emes. Árıne, bul máselege de mekeme basshysy, jergilikti atqarýshy bılik tarapynan resmı jaýaptar berildi...
Júzdegen jumysshylardyń bas kóterýi munymen tolastaǵan joq. Oblys ortalyǵyndaǵy «Taraz energo ortalyǵynyń» qyzmetkerleri de qymbatshylyqtyń qos búıirden qysqanyna qaramastan, jalaqynyń kóterilmeıtinin aıtyp, janaıqaıyn jetkizdi. 120-130 myń teńgeniń kólemindegi eńbekaqy jan baǵýǵa jetpeıtinin aıtyp shyryldaǵan slesar men basqa da mamandardyń ýáji qalaı desek te oryndy.
Qyzmetkerler bas kótergen sátte jumysshylardyń janynan tabylǵan mekemedegi bas ınjenerdiń orynbasary Maqsat Sársenbaev áriptesteriniń 10 paıyzdy qanaǵat tutpaıtynyn aıtyp, aılyqty 30 paıyzǵa deıin kóterý úshin tarıfti joǵarylatý mańyzdy ekenin tilge tıek etýmen shektelgen edi. Iá, osylaısha, áýlıetalyq áleýmet qańtarda da qarap qalmaı, máseleni tótesinen qoıdy...
Budan keıin M.H.Dýlatı atyndaǵy Taraz óńirlik ýnıversıtetiniń qyzmetkerleri aılyqtyń shaılyqqa jetpeıtinin aıtyp, janaıqaıyn BAQ ókilderine jaıyp saldy. Prezıdent Joldaýynan keıin jalaqynyń kóteriletininen úmittengen olar onsyz da az eńbekaqydan aqsha ustalǵanyn da kúıine jetkizgen edi. Joǵarydaǵy ózge máselelermen qatar bul daý da barlyq taraptardyń pikiri qamtylyp, «О́ńirlik ýnıversıtettegi ómirlik daý» taqyrybymen «Egemen Qazaqstan» gazetinde jarııalandy.
Áleýmettik máseleni alǵa tartqan aǵaıyn aqpan aıynda da aıylyn jıǵan joq. Birer kún buryn shahar tazalyǵyna jaýapty qyzmetkerler ákimdik aldyna jınalyp, máseleni tótesinen qoıdy. Onsyz da aıdan-aıǵa jalaqysyn ázer jetkizip júrgen jurtty sońǵy aıdyń jalaqysynan qaǵylamyz ba degen oı mazalapty. Bas kótergen buqara qoǵamdyq qyzmetkerlerdiń eshqaısysy esh jerde tirkelmegenin tilge tıek etti. Alaıda aı boıy shahar kóshelerin tazalap kelgen. Sózderine sensek, aı buryn jaýapty seriktestik basshysy jumystan shyǵý týraly ótinish jazdyryp alypty. Jumyspen qamtý bóliminiń joldamasyna sáıkes jumysqa qabyldaıtyndaryn da aıtqan. «Jaýaptylar jalaqynyń jartysyn jumyspen qamtý bólimi, jartysyn ózderi tóleıtinin aıtqan. Endi ne ana jaqta, ne myna jaqta joqpyz. Biraq biz áli jumys istep jatyrmyz», degen «Jasyl El Taraz» JShS-niń qyzmetkeri Nurlan Chappaevtyń ýájin ózgeler de qoldady.
Jumysshylar daýynyń qasynan tabylǵan Taraz qalasynyń ákimi Baqytjan Orynbekov tehnıkalyq aqaýdyń saldarynan bazanyń isten shyqqanyn aıtyp, máseleni ońynan sheshýdi ózi qadaǵalaıtynyn jetkizdi.
Ákim máseleni retteımin degenshe «jasyl eldikter» taǵy bir máseleniń shetin shyǵardy. Olar shahardy tazalaıtyn, kúl-qoqysty jınaıtyn qarapaıym qural-jabdyqtardyń jetispeıtinin aıtyp, qaıta bas kóterdi. Bir kúrekke talasqan jumysshylar men tisi joq tyrmamen iske kirisetin qyzmetkerlerdiń janaıqaıy kimdi de bolsyn oılandyrmaı qoımaıtyny anyq. Qysqasy, sanaýly kúnde bir mekemeniń qyzmetkerleri eki ret shý shyǵarǵany óńir basshylaryna abyroı ápermesi anyq. Áriptesteriniń daýyna ún qatqan «Jasyl El Taraz» JShS dırektory Azamat Ábishov jumysshylar sál shydasa, másele ońynan sheshimin tabatynyn aıtýmen shekteldi.
Halqynyń sany mıllıonnan asatyn óńirdiń aýdandaryn qaıdam, oblys ortalyǵynda jurtshylyq jaǵdaıdyń máz emes ekenin aıtyp bas kóterip turady. Al oblys ákimi Nurjan Nurjigitovtiń tóraǵalyǵymen ótken alqaly jıyndarda basqarma basshylary jurtty jumysqa ornalastyrýda jan salmaı eńbektenip jatqandaryn alǵa tartady...
Jambyl oblysy
