25 jastaǵy Nádirdiń mamandyǵy mehanızator. Oral qalasyndaǵy kásiporyndardyń birinde aýyr tehnıka júrgizedi. Kishkentaıynan tehnıkaǵa beıim, qoly sheber jigit polısııa kóliginiń tóbesindegi qyzyl-kók shamyn da jarqyldap oınap turatyndaı etip jasaǵan. Áýdem jerden qaraǵanda naǵyz polısııa kóligi turǵandaı áser beredi.
«Kópten oıymda júrgen iske aqpannyń 14-i kúni kiristim. Ol kúnge deıin bizdiń jaqta qar jaýmady ǵoı. Áýeli aınaladaǵy qardy jınap, uzyny 3,5 metr, eni 1,7 metr etip úıip aldym. Oǵan kún jarym ketti. Árıne, kóbine keshte, jumystan kelgen soń, jasap júrdim. Jalpy, nobaıy shyqqan soń naqty detaldaryna kiristim. Sóıtip, alty kúnde tolyq jasap shyqtym», deıdi Nádir.
Nádirge qardan polısııa avtokóligin jasaý ıdeıasy kádimgi oıynshyq stroboskoptyń qurylysyn aqtaryp otyryp kelipti. Stroboskop degen qutqarýshy nemese jedel járdem, polısııa sekildi arnaıy qyzmet kólikterine ornatylatyn sıgnal-sham ǵoı. Sóıtip, kishkentaı ıdeıadan úlken is týǵan.
Osy oqıǵadan keıin Nádirge Batys Qazaqstan oblystyq polısııa departamentinen telefon shalyp, rahmet aıtypty. Quqyq saqshylary qar-kólikti ózderi kelip kóremiz degen eken. Biraq qat-qabat sharýamen ýaqyt tappaǵan kórinedi.
Byltyr da óz aýlasynyń janynan Oral qalasyndaǵy ortalyq meshittiń maketin qardan jasap shyqqan N.Qýanaev aspannan aq ulpa jaýǵanyn kútip júr. Keler jyly sheber jigit bizdi nemen tańǵaldyrar eken?
Batys Qazaqstan oblysy
