Qoǵam úni eskerildi

Byltyr naýryz aıynda Prezıdent Qasym-Jomart Toqaev Astana men Almaty ákim­de­rine qala turǵyndarynyń óti­nish­terine qulaq asýdy jáne tur­ǵyn úı keshenderiniń janynan negizsiz salynyp jatqan kóp­qa­batty úılerdiń qurylysyn toq­tatýdy tapsyrǵan bolatyn. «Ádiletti Qazaqstan» tujy­rym­da­masyn negizge alǵan turǵyndar qor­da­lan­ǵan problemalardy qoǵam talqysyna salýǵa ún qosyp júr. Ásirese sońǵy ýaqyttary bul turǵyda belsendilik baıqalǵan. Oń sheshimin taýyp, túıini tar­qa­ǵan jaılar jeterlik. Sonyń basym bóligi – qurylys salasyna qatysty máseleler.

Megapolıstiń Bos­tan­­dyq aýdanynda boı kóter­gen tórt qabatty ǵımarattyń qu­ry­ly­sy zańdy óreskel buza otyryp salynǵandyǵy turǵyndar narazylyǵyn týdyrǵan edi. Má­se­­lege qala qurylysyn baqy­laý basqarmasy aralasyp, Qo­ja­nov kóshesiniń shyǵy­syn­da ornalasqan nysannyń talapqa saı emestigin ári bekitilgen bas jospardan aýytqyǵanyn anyq­ta­ǵan. Eki jylǵa sozylǵan sot úderisi ǵımaratty buzý týra­ly sheshim shyǵarǵanymen, sot she­shi­min oryndaý kezinde men­shik ıesi jer telimin ózge tul­ǵa­ǵa satyp úlgergen. Qala qu­ry­lysy basqarmasynyń jer te­li­min satý shartyn jaramsyz dep taný týraly talap-aryzynan soń mámile jo­ıy­lyp, buzý týraly sheshim kúshinde qaldy. Dese de nysandy buzý merzimi áli belgilenbegen.

О́tken jyldyń sońynda «Po­lı­tehnı­cheskıı» kóshesiniń bir bó­ligi jeke kom­panııaǵa tıesili degen jeleýmen jabylǵan edi. Atalǵan jaı kóshe turǵyndaryn ashyndyryp, jaǵdaı qoǵamdyq rezo­nans týdyrdy. Ákimdik júrgizgen tıis­ti sharalardan keıin qu­rylys salýshy jobany ózgertti. Jabýly qazan jabý­ly kúıde qalsa, jol ortasynan kóp­qa­bat­ty eki birdeı tur­ǵyn úı salynyp ketýi yqtımal edi. Jurtshylyqpen júz­des­ken Almaty qalasynyń ákimi Erbolat Dosaev kósheniń qaıta ashylǵanyn, jol jabyny kompanııa esebinen qaıta qalpyna keltiriletinin jet­kizdi. Osylaısha, jer ýchas­kesi qala­nyń kommýnaldyq menshigine qaı­ta­ryl­dy.

Almatynyń Bostandyq aýdanynda salynyp jatqan taǵy bir úıdiń sapasyna qatysty tur­ǵyndar shaǵymy mamandar nazaryna ilikti. Menshik ıesi qalalyq josparlaý jáne ýrbanıs­tı­ka basqarmasynyń kelisiminsiz taý etegine tur­ǵyn úı keshenin salýdy bastaǵanymen qoımaı, qu­rylys talaptaryn óreskel buzǵan. Tekserý ba­ry­synda tireýish qabyrǵalarynyń joqtyǵyna baılanys­ty qurylys jumystary toqtatylyp, taý bókterindegi baspanalardyń qaýipsizdigin elemegen tulǵaǵa qatysty ákimshilik hattama toltyryldy. Nátıjesinde, menshik ıesi aıtylǵan sógisten qorytyndy shyǵaryp, qaýipsizdik boıynsha barlyq olqylyqtardy joıatynyn jetkizdi. Mundaı jaılardan sabaq ala bastaǵan kásipkerler men ja­ýap­ty mekemeler zań talaptaryna barynsha zeıin­men qaraýyna týra keledi. Ásirese qurylys sapa­syna qa­tys­ty máseleler sergektikti qajet ete­di.

Aıtpaqshy, apta buryn Almaty qa­la­sy ekologııa jáne qorshaǵan orta bas­qarmasynyń mamandary «Nurlytaý» shaǵyn aýdanynda 63 jemis aǵashynyń zańsyz kesilgenin anyqtady. Aıyptylar aıyppul arqalap, kesilgen aǵashtardyń ornyna eń kemi 2,5 m bolatyn 3150 aǵash egýge mindetteldi. Qoldanystaǵy zańnama aıasynda tıisti shara qabyldaý úshin Almaty qalasynyń polısııa de­par­tamentine jáne Almaty qalasynyń mamandandyrylǵan tabıǵatty qorǵaý prokýratýrasyna hat joldanǵan.

Memleket basshysy Joldaýynda: «Barlyq sheshim jan-jaqty ekshelip, ashyq ári ádil, eń bas­tysy qoǵam múddesi men talabyn eskere otyryp qabyldanýǵa tıis. Oń ózgeristiń bárin jaqyn arada júzege asyrýǵa nıettimin. Halyq qoldaýy osy maqsattarǵa jetýdiń basty kepili bolady. Kózdelgen ıgi ózgeristerdi iske asyrýǵa neǵurlym kóp azamat qatyssa, nátıjege soǵurlym tezirek jetemiz», degen edi. Al ádiletti qoǵam ornatýǵa aza­mattyq qoǵamnyń belsene aralasýy Prezıdent aıtqan ıgi nátıjelerdiń júıeli júzege asýyn jaqyndata túspek.

ALMATY