2006 jyly qurylǵan «SemAZ» seriktestigi Qazaqstandaǵy aýyl sharýashylyǵy men kommersııalyq júk tehnıkasynyń otandyq óndirýshisi. Búginde kásiporynda 400-den astam adam jumys isteıdi. «Aýyl» partııasynan túrli deńgeıdegi jergilikti máslıhattarǵa kandıdattarmen kezdesýge partııa belsendilerimen qatar júzge jýyq jumysshy qatysty. Jergilikti máslıhattarǵa kandıdattar jıynǵa qatysýshylarǵa «Aýyl» partııasy saılaýaldy baǵdarlamasynyń baǵyttaryn túsindirip, úgit-nasıhat jumystaryn júrgizdi.
«Aýyl» partııasy eldi agrarly-ındýstrııaly derjavaǵa aınaldyrýdy kózdeıdi. «SemAZ» sııaqty otandyq zaýyttardyń paıda bolýy, tehnıkalardy jınastyrýdy qolǵa alýy jaqyn bolashaqta óz tehnıkamyzdyń paıda bolýynyń alǵysharty. «SemAZ» kásiporny kópke úlgi. Zaýytta eńbek adamy, onyń ishinde qoǵam qozǵaýshysy – jumysshylar tabysty eńbek etip júr. Biz eńbek adamyna erekshe quqyqtyq mártebe berýge qol jetkizý úshin kúresemiz», dedi jınalǵandar aldynda sóz alǵan «Aýyl» partııasynan jergilikti máslıhatqa kandıdat Serik Baıǵalıev.
Jıyn barysynda kandıdattar jumysshylar saýalyna jaýap berip, usynystaryn tyńdady. Kandıdattar «Aýyl» partııasy Májiliske barǵanda eńbek adamyna erekshe quqyqtyq mártebe berýge kúsh salatynyn aıtty. «Aýyl» partııasynyń aýyldyqtarǵa ǵana emes, qalalyqtarǵa da usynatyn kóptegen baǵyty bar ekenin atap ótti.
«Qýatty aýyl – eldiń senimdi tiregi. Biz azyq-túlik naryǵynan artyq deldaldardy yǵystyrýǵa bar kúshimizdi salamyz. Fermerlerdi iri saýda ortalyqtaryna múmkindiginshe jaqyndatamyz. Partııa ákimder men máslıhat depýtattarynyń halyq aldyndaǵy derbes jaýapkershiligin kúsheıtedi. Ol úshin jergilikti memlekettik basqarý jáne ózin-ózi basqarý týraly zańnamany túbegeıli qaıta qaraıdy. Olar halyq aldyndaǵy mindetterin oryndamaǵan jaǵdaıda eń qatań jazalaý sharalaryn qoldanýǵa qol jetkizedi», dedi kandıdattar.
