Alpysqa jýyq adamdy jumyspen qamtyp, kásibin dóńgeletip otyrǵan seh basshysy Álıhan Jumashev «Aq jol» atynan bir mandattyq júıe boıynsha qalalyq máslıhat depýtattyǵyna usynylǵan. Búginde sharýasy órge domalaǵan kásiporyn ónimin tek respýblıka boıynsha emes, Oralǵa kórshiles jatqan Reseıdiń bes oblysyna taýar jetkizýdi kózdep otyr. Seh jumysymen tanysqan shtab ókilderi jas kásipkerge aldaǵy saılaýda sáttilik tilep, partııanyń otandyq óndirisshilerdi qoldaý baǵytyndaǵy jumystary jalǵasa beretinin aıtty.
Budan soń úgit-nasıhat toby Oral transformator zaýytyna bardy. Aýysymynda 250-ge jýyq adam jumys isteıtin iri kásiporyn – eldegi transformator shyǵaratyn biregeı óndiris oryndarynyń biri. Alys-jaqyn sheteldermen tyǵyz baılanys ornatqan zaýyt ónimin eksportqa shyǵarady. Kásiporyn jumysymen jaqyn tanysyp, qyzmetkerler suraǵyna jaýap bergen partııa tóraǵasy Azat Perýashev mundaı zamanaýı, tehnologııalyq zaýyttardyń el ekonomıkasyna qosatyn úlesi zor ekenin aıtyp, memleketten olarǵa jan-jaqty qoldaý kerektigin atap ótti. Al partııa múshesi Qazybek Isa ulttyq múdde saltanat qurǵan elde kásiptiń de damýy zańdylyq ekenin jetkizdi. «Ol úshin saılaýǵa belsendi qatysyp, óz daýysyńdy berý kerek», dep túıindedi oıyn ult janashyry.
Sonymen qatar respýblıkalyq úgit-nasıhat toby Oraldaǵy iri «Sıtı sentr» saýda-oıyn-saýyq ortalyǵyna bardy. Shahardyń ortalyǵynda ornalasqan «Sıtı sentr» saýda-oıyn-saýyq ortalyǵy qazirgi tańda 350 kásipkerge saýda ornyn berip, 300-ge jýyq adamdy jumyspen qamtyp otyr. Ortalyq qala turǵyndary men qonaqtarynyń jıi baratyn súıikti orny desek te bolady. Partııa jumysyn, saıası baǵyt-baǵdaryn tanystyrýshy úgit-nasıhat toby ortalyq jumysshylarymen kezdesti. Saýda salasynda júrgen kásipkerlerdi nesıe, ekonomıkalyq zańdarǵa ózgerister engizý máselesi alańdatady. Shtab ókilderi Aqjaıyq jurtshylyǵyna óz tańdaýlaryn sanaly túrde jasap, Ádiletti Qazaqstandy birge damytýǵa shaqyrdy.
