Altynnyń mol kómbesi

Bulaq aýylynyń Qulsary áýlıe jatqan qorym janynan altyn qory tabylypty degen alypqashpa sóz shyndyqqa aınalyp, núkte qoıyldy. Jer qoınaýyn barlaý jumystaryn aıaqtaǵan reseılik «Áýlıe Gold Maınıng» taý-ken jynystaryn óńdeý kompanııasy qazba isterine kirisip ketti. 400 gektar aýmaqty alyp jatqan ken ornynan óte baǵaly metall 6-12 metr tereńdikte ashyq ádispen óndirilip, osy jerde boı kóteretin óndiris oshaqtary tolyq qýatynda jumys istegen kezde 250-ge jýyq adam jumysqa tartylmaq. Indýstrııalandyrý kartasy boıynsha qolǵa alynǵan «Quramynda baǵaly metaldar bar ken ornyn ıgerý jáne óńdeý» jobasyna alǵashqy kezeńde 15 mıllıon dollar ınvestısııa quıylǵan. Jańa ken ornynyń ashylý sharasyna qatysqan oblys ákiminiń orynbasary Erlan Áýkenovtiń sózine qaraǵanda, bıyl 130 myń tonna, kelesi jyly 260 myń tonna ken arshylyp, 2018 jyly 600 myń tonna quraıtyn bolady. Ázirge baǵalanǵan altyn qory 2 tonna. Atalmysh kompanııanyń dırektory Pavel Djýlaı geologtardyń adam túgili perishteniń basyn aınaldyratyn altynnyń mol kómbesin barlaǵanyn aıtyp otyr. О́mir ESQALI, «Egemen Qazaqstan». Soltústik Qazaqstan oblysy, Esil aýdany, Bulaq aýyly.