Osydan bes jyl buryn alaqandaı aýylda negizi qalanǵan óner mektebi búginde qanatyn keńge jaıyp, respýblıkamyzdyń ár aımaǵynan, atap aıtqanda Almaty, Astana, Ekibastuz qalalary men Almaty oblysynyń Eńbekshiqazaq, Talǵar aýdandarynan talantty shákirtter tárbıeleý isin bastap ketken. Qazirgi kúni el boıynsha 138 mamandy eńbekpen qamtyp otyrǵan óner mektepterinde 4 myńǵa tarta bala ónerge beıimdelip, órisin keńeıtýde.
– Balalar ónerge óte beıim, tek ata-anamen birlesip, durys baǵyt-baǵdar berýimiz kerek. Bizdiń óner mektebimizde 12 úıirme men 3 sporttyq seksııa jumys isteıdi. Keıingi ýaqytta kishkentaı balalardyń horeografııaǵa qyzyǵýshylyǵy basym. Buǵan qosa vokal, dombyra, sýret salý úıirmelerine de kóptep kelýde. Halyqtyq qolónerge, sonyń ishinde aǵash oıý, túrli buıymdar jasaý, kórpe, keste tigýge yntanyń artýy qýantady. О́zimniń mamandyǵym – baletmeıster. Sondyqtan alǵashqy bastamamdy «Arý» atty bıshiler ansamblin qurýdan bastaǵanmyn. Osy ujymda 100-ge jýyq bıshi qanatyn qataıtyp, aldy ónerdiń ár qıyrynda qyzmet etip júr. Tájirıbemiz tolysa kele osyndaı úlken iske táýekel ettik. Qazirgi kúni respýblıka kóleminde on shaqty óner mektebin ashtyq, – deıdi ART PRODUCTION óner mektebi jelisiniń bas dırektory Gúljan Túsibııanova.
Onyń jeteýi Talǵar aýdanynda turaqty jumys istep jatqanyn aıryqsha ataǵymyz keledi. Úsheýi Talǵar qalasynda, qalǵandary Jańalyq, Belbulaq, Keńdala, Nura aýyldarynda ornalasqan. Aýyl balalarynyń ónerge degen yntasyn arttyryp, talabyn ushtaýdy basty mindet etken bul mektepte jas ónerpazdar shyǵarmashylyqtaryn tegin damytady. Oǵan ata-analar da dán rıza.
Memlekettik qoldaýǵa ıe óner mektebinde esimi elge málim sýretshi, eńbek ardageri Marat Kıtabov, Ulttyq dızaın akademııasynyń akademıgi, zerger Serikhan Mádiǵalıev, elimizdiń mádenıet qaıratkeri, sahna sheberi Ádilhan Qabylov syndy ustazdar jas býyndy sýretshilik, aǵash sheberi, teatr tanýǵa baýlyp keledi. On saýsaǵynan óner tamǵan balalar qolóner buıymdarymen Bolgarııa, Grýzııa, Qyrǵyzstan, Túrkııa elderine baryp, halyqaralyq baıqaýlardyń jeńimpazdary atanǵanyn maqtan etýge bolady. Kópshilik olardyń kelesheginen zor úmit kútip otyr.
– Balalardyń bos ýaqytyn tıimdi ótkizýine, ónerde de, sportta da álemdik arenaǵa kóterilip, kók týymyzdy kókte jelbireter azamat bolyp qalyptasýyna tamshydaı bolsa da úles qosyp, baǵyt-baǵdar berý – basty maqsatymyz. Osy arqyly jas óskinniń qımyl-qozǵalysyn arttyryp, talantyn ashyp, shyǵarmashylyǵyn damytýyna yqpal etýdemiz, – deıdi Gúljan Nurbekqyzy.
Osy kúni shákirt tárbıeleýde ǵımarattardy jalǵa alyp júrgen kásip ıesi Talǵar qalasy men Belbulaq aýylynan jer alyp, sán-saltanaty úılesken zamanaýı óner jáne saýyqtyrý mektepteriniń irgetasyn qalaǵanyn qýana jetkizdi. Aldaǵy jazda qurylys jumystary tolyq aıaqtalsa, ónerpaz balalar jańa ǵımaratta jattyǵatyn bolady.
Ulbosyn ISABEK,
jýrnalıst
Almaty oblysy,
Talǵar aýdany
