«Aýyl» partııasynyń delegasııasy birden Mahambet aýdanynda ornalasqan «Saraıshyq» JShS-ǵa at basyn tirep, seriktestik ujymymen kezdesti. Asyl tuqymdy eshki ósirýmen aınalysatyn sharýashylyq – osy saladaǵy ónerkásiptik tıptegi eki iri kásiporynnyń biri. Sharýashylyqtyń túrli ónim shyǵaratyn óńdeý-shyǵarý ortalyǵy bar. Fermany «Aýyl» partııasynan Májilis depýtattyǵyna kandıdat Tamıla Rozmetova basqarady. Ondaǵan jyl buryn qaıta qurylyp, zamanaýı qalypqa keltirilgen ferma búginde úlken keshenge aınalyp otyr.
«Bul – eńbek adamynyń nátıjeli jumysynyń kórsetkishi. Osyndaı adamdardyń tókken teri memleket tarapynan eskerilip, qurmettelip otyrsa, halyqtyń aýyl sharýashylyǵyna, agrobızneske degen yntasy artar edi. «Aýyl» partııasynyń maqsaty – aýyl bıznesin damytýda jiberilgen olqylyqtardyń ornyn toltyrý. Biz Parlament Májilisine barǵanda bel sheshe kirisetin jáne belsene kóteretin basty máselemizdiń biri ári biregeıi – búginde quny túsip, qadiri ketken eńbek adamyna degen qurmetti burynǵy deńgeıine qaıtarý», dedi «Aýyl» partııasynyń tóraǵasy Álı Bektaev.
Zamanaýı tehnologııa arqasynda joǵary ónimdilikke qol jetkizgen eshki fermasy partııa men onyń saılaýaldy baǵdarlamasynyń qurmetine eshki sútinen jasalǵan, qaptamasyna partııanyń «Aýyl tórge shyqsyn!» atty baǵdarlamasy jazylǵan irimshiktiń jańa toptamasyn shyǵardy. Ol sol sátten bastap Atyraý oblysynyń búkil dúkenine satylymǵa shyǵaryldy.
Atyraý oblysy – munaıly, ónerkásibi damyǵan ólke bolýymen qatar aýyl sharýashylyǵyn da aldyńǵy orynǵa shyǵarǵan aımaq. О́ńir halqynyń agrobızneske degen qyzyǵýshylyǵy joǵary. Saraıshyqta óte qyzyqty tájirıbe jasalyp, óte jaqsy nátıjege qol jetkizgen. Munda lımon ósiretin jáne sodan aýyz toltyryp aıtarlyqtaı tabys tabatyn jylyjaı bar. Muny shaǵyn sharýashylyqtar úshin nátıjeli tájirıbe retinde taratýǵa ábden bolady.
