Atyraýdaǵy saılaýshylarmen alǵashqy kezdesýde «Respublica» partııasynyń teń tóraǵasy Syrymbek Taý jastardy qoldaý máselesin kóterdi. Ol barlyq ýaqytta aǵa býyn ókilderi jańa, jas urpaqqa moraldyq-etıkalyq turǵydan kóńilderi tolmaǵanyn aıtty. Biraq, onyń oıynsha, jastar úshin eshteńe istelmese, mundaı synnyń kúmán týdyratyny anyq.
«Bir kezderi atalarymyz ákelerimizge: «Bizdiń jastar buzyldy» dep aıtqan. Al keıinirek ákelerimizdiń: «Urpaǵymyz ózgerip barady, tárbıe degen múlde joq» degen sózderin estıtin boldyq. Al bizdiń mindetimiz – jastarymyz osyndaı synǵa negiz bolmas úshin jaǵdaı jasaý. Jastar úshin tıimdi eshnárse istemesek, onda olardy buzyldy deýge haqymyz joq», dedi S.Taý.
Aıta ketý kerek, «Respublica» partııasynyń músheleri elimiz boıynsha 30 myń shaqyrymnan astam joldy júrip ótip, naýqannyń 2 aptasynda úgit-nasıhat jumystarymen 1 mıllıon adamdy qamtydy. Eń bastysy, partııa músheleri kún saıyn azamattardyń máselelerin saralap, Parlament Májilisinde sheshýdi kózdeıdi. «Respublica» partııasynyń teń tóraǵasy, Parlament Májilisiniń depýtattyǵyna kandıdat Rýslan Berdenov óz sózinde osyǵan nazar aýdardy.
«Biz – isker adamdarmyz. Shetelge shyǵýǵa shamamyz jetedi. Materıaldyq baılyǵymyz da, ıaǵnı qajettiniń bári bizde bar. Biraq erteń bizden: «Eliń úshin ne istediń?» dep suraıdy. Biz partııa bolamyz ba, joq pa, ol mańyzdy emes. Alaıda el ıgiligine qyzmet etýdi jalǵastyra beremiz. Al azamattardyń san jyl boıy qordalanǵan problemasyn sheshý – bizdiń alǵa qoıǵan basty maqsattarymyzdyń biri. Bizdiń maqsatymyz aıqyn jáne mindetimiz ashyq, biz Parlamentke halyqtyń máselesin aıtyp, shynaıy ahýaldy bılikke jetkizý úshin baramyz. Bizdiń basty maqsatymyz – Májiliste biz sııaqty el qamyn oılaıtyn adal kásipkerlerdiń qataryn kóbeıtý», dedi ol.
