«Áleýmettik ádildik bolýy kerek. Máselen, kenshilerge, qazandyqtarda jumys isteıtinderge ústeme aqy joq, járdemaqy qarastyrylmaǵan. Eger siz ózińiz saılaýǵa barmasańyz, daýys bermeseńiz, baıaǵy jartas sol jartas qalpynda qalady», dedi Qaırat Aıtbaı.
Astana máslıhatynyń depýtattyǵyna kandıdat Álibek Qashkeev kezdesýde elordanyń energetıka máselelerin qozǵady. Buryn energııa taratýshy kompanııanyń top-menedjeri bolǵan ol ózi mán-jaıyn jaqsy biletin máselelerdi sheshýdiń joldaryn aıtty. «Baıtaq» belsendisi 10 jyldan beri jyr bolǵan JEO-3-tiń jaıyn eske saldy. Sondaı-aq elektr qýatyn tarıfteý jáne únemdeý máselesin kóterdi.
«Biz Májilis pen máslıhatqa ákimdiktiń maqsatty qarjyny ádil bólýi, barlyq qyzmet aıasynda ákimdiktiń ózi tıisinshe jumys isteýi, ózine júktelgen jaýapkershilikten jaltarmaýy úshin baramyz. Depýtattyń bir fýnksııasy – ákimniń ózi atqaratyn laýazymǵa sáıkestigi nemese laıyq emestigi týraly másele qoıý jáne materıaldy quqyq qorǵaý organdaryna berý, halyq múddesi úshin qajet jaǵdaıda biz mundaı múmkindikterdi múlt jibermeýimiz kerek», dedi Álibek Qashkeev.
Sondaı-aq kezdesýde JEO-ny jańǵyrtý máselesi talqylandy. Ekologııa mınıstrliginiń málimetinshe, 2022 jyly elordada JEO-1 jáne JEO-2-ge gaz qubyrlaryn tartý qurylysy aıaqtaldy. Qazir sý jylytý qazandyqtary gazben jumys isteıdi.
Al Almatyda «Baıtaq» jasyldar partııasynyń belsendileri men jas sportshylar velomarafon uıymdastyrdy. Is-sharaǵa qatysýshylar mádenıet jáne demalys saıabaǵynan bastap, shahar kósheleri arqyly 10 shaqyrymdy baǵyndyrdy. Saıası qurylym ókilderi osy arqyly qoǵam arasynda salamatty ómir saltyn qalyptastyryp, kúndelikti avtokólikten góri velosıpedti jıi paıdalanýdy nasıhattaýdy kózdep otyr. Belsendiler jastardyń bos ýaqyttaryn taza aýada tıimdi ótkizýi mańyzdy dep esepteıdi.
