Kezdesý barysynda qatysýshylarǵa úgit-nasıhat materıaldardy taratyldy, sondaı-aq elde orta tap qurý jáne kedeılikti joıý mindeti qoıylǵan partııanyń saılaýaldy baǵdarlamasynyń negizgi baǵyttary túsindirildi.
Partııalastardyń pikirinshe, buǵan kedeılikke qarsy zań qabyldaý, sondaı-aq salyq saıasatyna durys kózqarasty qalyptastyrý arqyly qol jetkizýge bolady. Atap aıtqanda, otandastar ónimi men qyzmetterinen qosymsha qun salyǵyn alyp tastaý, iri kompanııalarǵa qatysty progressıvti salyq salý shkalasyn engizý, shaǵyn jáne orta bıznesti kredıtteý kezinde deldaldardy joıý, sondaı-aq kásipkerlerge memleket tarapynan beriletin nesıe tártibin aıqyndaý qajet.
«Baǵdarlamanyń negizgi maqsaty – eldiń bıligi men baılyǵy halyqqa tıesili bolýy kerek, ıaǵnı saılaýdan keıin Qazaqstanda halyqtyq úkimet, yqpaldy Parlament, táýelsiz sottar jáne halyq saılaǵan ákimder saılaýshylarǵa qyzmet etýi qajet. Ol úshin saılaýǵa kelińiz, daýys berińiz! Jańa Qazaqstandy qurýǵa belsendi qatysyńyz», dedi Nurdáýlet Orazhanov.
Al Parlament Májilisiniń depýtattyǵyna kandıdat, partııa tóraǵasynyń orynbasary Ashat Asylbekov Atyraý qalasyndaǵy «Kóktem» bazarynda saılaýaldy úgit-nasıhat jumystaryn júrgizdi.
Partııa ókili Atyraý jurtymen júzdeskende Halyq partııasy áıelderdi 58 jasta zeınetke shyǵýdy qoldap bastama kótergenin aıtty. Nátıjesinde Úkimet zeınet jasyn kóterýge 5 jylǵa moratorıı engizdi. Sondaı-aq partııa AÁK-ten bas tartyp, onyń ornyna balalar járdemaqysynyń mólsherin 70 000 teńgege deıin kóbeıtý kerek dep esepteıdi. Qazaqstandaǵy áleýmettik teńsizdik saldarynan búginde 3 mıllıonǵa jýyq adam kedeılikte ómir súrip otyr. Sondyqtan QHP «Kedeılikpen kúres týraly» zańnyń qabyldanýyn talap etedi jáne búgingi kúnge eń tómengi jalaqy 140 myń teńge bolýy kerek dep sanaıdy.
Kezdesýde kóterilgen taǵy bir másele – shaǵyn jáne orta kásipkerlikti damytý. «Bul – áleýmettiń áleýetin arttyrýǵa úlken múmkindik. Sondyqtan memleket jańa salyq saıasatyn engizýi kerek», dedi kandıdat.
