Bıznesti damytý, nesıeniń qymbat mólsherlemeleri, offshorlyq esepshottardaǵy halyq qarajatyn Qazaqstanǵa qaıtarý týraly tarmaqtar óńir turǵyndarynan qoldaý tapty. Jastardy ıpotekalyq nesıe máselesi tolǵandyrdy.
Al kásipkerler sheksiz múmkindikke ıe sot oryndaýshylarynyń áreketine narazylyqtaryn aıtty. Olar kompanııalardyń esepshottaryn buǵattap, tabys taýyp, qaryzdarynan qutylýyna kedergi jasaıdy. Kásiporyndardy dızeldik otynmen qamtamasyz etý máselesinde de kereǵar jaǵdaı týyndap otyr. Halyqqa, aýyl sharýashylyǵyna jeńildikter qarastyrylsa, kenishter men kólik kompanııalary ony 3 ese qymbatqa satyp alýǵa májbúr. Olardyń kópshiligi bankrottyqtyń aldynda tur. «Bul máselelerdiń barlyǵy baqylaýda bolady», dep sendirdi Dmıtrıı Vasılev.
Partııa óz tarapynan kásipkerlik salasyndaǵy máselelerdi sheshýdiń birqatar jolyn usynýǵa daıyn. Atap aıtqanda, áleýmettik mańyzy bar taýarlar men bıznestiń basym sektorlary úshin 0-6% deńgeıinde qosymsha qun salyǵynyń tómendetilgen mólsherlemelerin engizýdi talap etpek. Ulttyq Banktiń ekinshi deńgeıdegi banktik nesıe boıynsha bazalyq syıaqy mólsherlemesin jyldyq 4-5%-dan aspaıtyn tıimdi syıaqy mólsherlemesine deıin tómendetý máselesin kóterý qajet. Monopolıster tarıfteriniń negizdiligin – birinshi kezekte energetıka jáne temir jol kóligi salasynda tolyq kólemde tekserý júrgizý kerek.
«Biz aýyldyq jerlerde salyqtardy joıýǵa umtylamyz, adamdardyń BJZQ shotyndaǵy qarajatyn ózderi basqarǵanyn qalaımyz, medısınalyq saqtandyrý naqty bir adamǵa baılanyp, ol kez kelgen emhanada, qajetti ýaqytta kómek ala alatyn bolýy kerek», dedi Berik Dúısembınov.
Aqjoldyqtar jınalǵandardyń suraqtaryna jaýap berip, saılaýshylardyń usynystaryn nazarǵa aldy. Partııanyń saılaýaldy baǵdarlamasymen tanystyryp, saılaýda eldiń bolashaǵy úshin belsendilik tanytýǵa shaqyrdy.
