Is-shara barysynda kandıdattar elordalyq saılaýshylarǵa partııanyń saılaýaldy baǵdarlamasynyń basym baǵyttaryn baıandady. Al Parlament Májilisiniń depýtattyǵyna partııa tizimi boıynsha kandıdattar Nurlan Áýesbaev, Ajar Saǵandyqova jáne birmandattyq aımaqtyq okrýg boıynsha kandıdat Azamat Haısın «Ekibastuz 1-MAES» JShS jumyskerlerimen kezdesti. «Jylytý maýsymynyń eń qyzǵan shaǵynda Ekibastuzdaǵy JEO-da oryn alǵan qaıǵyly apat – elimizdiń energetıkalyq júıesiniń búgingi jaı-kúıi», dep atap ótti óz sózinde Nurlan Áýesbaev.
Kandıdattar JEO-daǵy kezek kúttirmeıtin máselelerdi, sondaı-aq bıliktiń apattan keıingi is-qımyldaryn talqylady. Sonymen qatar kezdesý barysynda partııanyń saılaýaldy baǵdarlamasynyń basym baǵyttary baıandaldy. Parlament Májilisiniń depýtattyǵyna birmandattyq aýmaqtyq saılaý okrýgi boıynsha kandıdat Valerıı Smokvın «Kókshetaý mıneraldy sýlary» AQ eńbek ujymymen kezdesti.
«Sosıal-demokratııalyq ıdeologııa – adamzattyń basty saıası jetistikteriniń biri. Ol – ozbyrlyq áreketter arqyly emes, kelisim men áleýmettik áriptestik negizine súıengen josparly ózgerister arqyly júzege asyrylatyn ádiletti qoǵam týraly búkilálemdik ıdeıalardyń damý nátıjesi. Bul – parlamenttik demokratııa men quqyqtyq memleket negizinde jasalǵan ár qadamyn kemshilikter men taptyq bólinýdi joıýǵa baǵyttaıtyn, memlekette, ekonomıkada jáne qoǵamda demokratııany júzege asyryp, sonymen qatar jeke jáne rýhanı bostandyqpen qamtamasyz etip, sol arqyly óz qundylyqtary – erkindik, ádilettilik pen yntymaqtastyqqa qol jetkizip, qorǵaıtyn qoǵamdyq úlgi. Búginde basymdyq tanytyp otyrǵan áleýmettik-ekonomıkalyq jáne saıası jaǵynan artta qalǵan elder esebinen ómir súrip otyrǵan tarıhı bolashaǵy joq kapıtalızmdi birtindep ózgertip, onyń ornyna halyqaralyq qarym-qatynasta ádilettik ornatyp, barlyq adamzattyń jappaı, jan-jaqty jáne turaqty damýyn qamtamasyz etip, materıaldyq ıgilikti olardyń ál-aýqatynyń udaıy ósýi úshin ádiletti túrde bólýdi júzege asyrýdy maqsat etedi», dedi kandıdat.
