*Radıkaldy «Boko Haram» tobynyń qarýly jasaqtary Nıgerııanyń soltústik-shyǵysyndaǵy bir eldi mekennen taǵy da 90-nan astam adamdy urlap ketken. Olardyń 60-y áıelder men qyzdar bolsa, qalǵandary er balalar kórinedi. Qashýǵa áreket jasaǵan 4 adam atyp óltirilgen.
*Súnnıtterdiń qarýly jasaqtary Irak astanasy – Baǵdat qalasynyń soltústiginde ornalasqan eldegi eń basty Baıdjı munaı óńdeý zaýytyn basyp alǵan. Burnaǵy kúni Irakqa kelgen AQSh-tyń memlekettik hatshysy Djon Kerrı Iraktyń taǵdyry taıaýdaǵy aptalarda sheshiletinin málimdeı kelip, biraq bul másele birinshi kezekte eldegi bılik basyndaǵylardyń 1 shildege deıin jańa úkimet jasaqtaı alýyna tikeleı baılanysty bolatynyn aıtqan edi.
*Sırııadaǵy hımııalyq arsenaldyń sońǵy bóligi elden shyǵaryldy jáne joıýǵa daıyn. Bul týraly Nıderlandtyń Gaaga qalasynda ótken baspasóz máslıhatynda Hımııalyq qarýǵa tyıym salý jónindegi uıym basshysy Ahmet Ýzıýmdjıý habarlady.
*Mysyr soty «Ál-Jazıra» telearnasynyń úsh jýrnalısin lańkesterge qoldaý kórsetti dep aıyptady. Olardyń úsheýi de 7 jyldan bas bostandyqtarynan aıyryldy. Olar: VVS-diń burynǵy tilshisi Pıter Greste, «Ál-Jazıranyń» Kaırdaǵy bıýro basshysy Mohammed Fahmı jáne prodıýser Baher Mohammed.
*Alǵashqy gaz «Ońtústik» aǵyny» boıynsha Avstrııaǵa 2016 jyldyń sońynda keletin bolady. Bul týraly Avstrııanyń OMV munaı-gaz kompanııasynyń resmı ókili Robert Lahner málimdedi. Keshe «Gazprom» men OMV korporasııasy Reseı prezıdenti V.Pýtınniń Avstrııaǵa resmı sapary kezinde osyndaı kelisimge qol qoıǵan.
*Eýroodaq Keńesi Albanııaǵa Eýropa odaǵy músheligine úmitker el mártebesin berdi. Bul týraly óziniń tvıtterinde EO-ny keńeıtý jáne kórshilestik saıasaty jónindegi komıssar Shtefan Fıýle habarlady. Ol, sondaı-aq, Albanııany quttyqtaı kelip, Keńestiń sheshimi eldiń osy baǵyttaǵy kúsh-jigeriniń nátıjesi ekenin atap ótti.
nAQSh-ta jolaýshylar poıyzy temirjol ótkelinde júk kóligimen soqtyǵysyp qaldy. Oqıǵa Massachýsets shtatyndaǵy Mensfıld qalasy mańynda oryn aldy. Vashıngonnan Bostonǵa kele jatqan poıyz relsten shyǵyp ketkenimen, 180 jolaýshynyń eshqaısysy aıtarlyqtaı zardap shekpegen. Biraq júk kóliginiń júrgizýshisi men eki jolaýshysy qaza tapqan.
*Lıtvanyń Joǵarǵy soty respýblıka bıligin Germanııaǵa ıtalııalyq sýretshi Antonıo Kampıdiń polotnosyn qaıtarýdy mindettedi. Kartına «Hrıstiń zıraty basyndaǵy úsh Marııa» dep atalady. Bul týyndy ekinshi dúnıejúzilik soǵystan keıin Germanııadan zańsyz áketilipti.
*GFR-de jekemenshik jeńil motorly ushaq ushý kezinde joıǵysh ushaqpen soqtyǵysqan. Oqıǵa Germanııanyń batysyndaǵy Zaýerland federaldy jerindegi Olsberg qalasynyń aspanynda oryn alǵan. Joıǵysh ushaq Keln qalasynyń túbindegi Nerfenıhe áskerı avıabazasyna aman-esen oralsa, eki adamy bar jekemenshik ushaq apatqa ushyrap, ushaqtaǵy eki adam da qaza taýypty.
Aqparat agenttikteri materıaldarynyń negizinde ázirlendi.
