Densaýlyq saqtaý mınıstrligi «hıdjama» - bul adamnyń terisine kesýler jasap, qan shyǵarýdyń ejelgi ádisi ekenin atap ótti.
«Bul prosedýrany jasaý kezinde adam terisiniń tutastyǵyna zaqym keledi, sonymen qatar ınvazıvti ádister qoldanylady. Invazıvti ádisterdi medısına mamandary júrgizýi kerek. Bul rette naýqastyń kelisimin alý qajet», dep jaýap berdi Densaýlyq saqtaý mınıstrliginde.
«Halyq densaýlyǵy jáne densaýlyq saqtaý júıesi týraly» kodekste Medısınalyq jáne farmasevtıkalyq qyzmet lısenzııalanýǵa jatady. Lısenzııalaýǵa jatatyn medısınalyq qyzmettiń kishi túrleri «Ruqsattar jáne habarlamalar týraly» zańda aıqyndalǵan. Kórsetilgen tizimde «hıdjama» ádisi joq.
Sonymen qatar Densaýlyq saqtaý mınıstrligi «Dezınfeksııa, dezınseksııa jáne deratızasııany uıymdastyrýǵa jáne júrgizýge qoıylatyn sanıtarııalyq-epıdemıologııalyq talaptar» sanıtarııalyq qaǵıdalarynyń talaptaryna sáıkes «hıdjama» rásiminde qoldanylatyn medısınalyq buıymdar synı medısınalyq buıymdar tobyna (tindermen, qýystarmen nemese qanaınalym arnasymen tikeleı janasatyn quraldar men jabdyqtar) jatatynyn atap ótti jáne olar plazmalyq nemese (sýtegi asqyn totyǵy negizinde) hımııalyq ádispen (zararsyzdandyrý quraldarynyń eritindilerine batyrý arqyly) zararsyzdandyrylýy tıis, oǵan býmen (artyq qysymmen sýmen qanyqqan býdyń áserinen), aýa ádisimen (qurǵaq ystyq aýamen) zararsyzdandyrý da jatady.
Densaýlyq saqtaý mınıstrligi joǵaryda aıtylǵandardy eskere otyryp, ınvazıvti emdeý ádisterin medısına qyzmetkeri qoldanystaǵy maman sertıfıkaty bolǵan kezde jáne sanıtarlyq erejeler men normalardy saqtaı otyryp júrgizýi kerek degen qorytyndyǵa keldi.
