Tıimdi jobalar biraqatar aýyl sharýashylyǵy ónimderiniń ımportyn azaıtady

ASTANA. 25 maýsym. Investısııalyq jobalardy iske asyrý aýyl sharýashylyǵy salasyna qatysty birqatar ónimderdiń ımportyn tómendetýge múmkindik beredi. Ortalyq kommýnıkasııalar qyzmetinde ótken brıfıngte «QazAgro» Ulttyq basqarýshy holdıngi» aksıonerlik qoǵamynyń basqarma tóraǵasy Dýlat Aıtjanov osylaı dedi. Bul týraly primeminister.kz habarlady. Dýlat Aıtjanovtyń aıtýynsha, búginde holdıngtiń ınvestısııalyq portfelinde jalpy quny 263 mlrd. teńge bolatyn 417 joba bar. Al jalpy quny 198 mlrd. teńgeni quraıtyn 310 joba paıdalanýǵa berilgen. Sonyń nátıjesinde 11 myń jumys orny qurylǵan. Bıyl taǵy da 68 jobany iske qosý josparlanǵan. Bul jobalardyń 20-sy 1-shi jartyjyldyqta iske kirisken. Dýlat Aıtjanov: ««QazAgronyń» 1 jobacynyń ózi tolyqtaı iske assa taýyq eti ımportynyń kólemi 20 paıyzǵa, sút jáne sút ónimderi ımporty 6 paıyzǵa, jemis-jıdek ónimderiniń ımporty 4 paıyzǵa tómendeıtin bolady», – dedi. Budan bólek, «QazAgro» Ulttyq basqarýshy holdıngi» aksıonerlik qoǵamynyń basqarma tóraǵasy 2020 jylǵa deıin syıymdylyǵy 1404,5 myń tonnaǵa jetetin astyq saqtaıtyn oryn salý kózdelip otyrǵanyn, sondaı-aq, bıylǵy jyly 2000 tonna et pen et ónimderin, 375 tonna jún men júnnen jasalǵan buıymdardy eksporttaý josparda bar ekenin jetkizdi. Joldybaı Bazar. Derekkóz: primeminister.kz. Foto: Strategy2050.kz.