«Qazgıdromet» RMK aqparaty boıynsha, eldiń basym bóligi Kaspıı teńizi aýdandaryndaǵy belsendi sıklonnyń yqpalynda bolady, osyǵan baılanysty jaýyn-shashyn kútiledi.
«Soltústikte, shyǵysta qatty jaýyn-shashyn (jańbyr, qar), ońtústikte, respýblıkanyń ońtústik-shyǵysynda kúndiz qatty jańbyr jaýady. Tek batysta jaýyn-shashynsyz aýa-raıy kútiledi», delingen habarlamada.
Sınoptıkter atap ótkendeı, el boıynsha jel soǵady, respýblıkanyń soltústik jartysynda, shyǵysynda, ortalyǵynda boran kútiledi. Eldiń ońtústiginde naızaǵaı oınaıdy. Birqatar óńirde tuman men kóktaıǵaq bolady dep boljanyp otyr.
Soltústik Qazaqstan oblysynyń ońtústiginde túnde qalyń qar jaýady, Shyǵys Qazaqstan oblysynyń soltústiginde, shyǵysynda, Abaı oblysynyń soltústiginde, túnde Pavlodar oblysynyń batysynda, soltústiginde jaýyn-shashyn (jańbyr, qar) kútiledi. Almaty oblysynyń taýly aýdandarynda, soltústiginde, ońtústiginde, Túrkistan oblysynyń taýly, taý bókterli aýdandarynda, Jambyl oblysynyń soltústiginde, batysynda, ońtústiginde, taýly aýdandarynda qatty jańbyr jaýady.
«Pavlodar oblysynyń batysynda, ońtústiginde, Abaı oblysynyń ortalyǵynda, túnde Aqmola, Qaraǵandy, Shyǵys Qazaqstan oblystarynyń soltústiginde, shyǵysynda, Túrkistan oblysynyń taý asýlarynda 30 m/s qatty jel kútiledi», delingen «Qazgıdromet» habarlamasynda.
