Ol Beıjińdeı alyp qalada «Ulttar ádebıeti» atty qos aılyq qazaqsha jýrnal shyǵaryp, ár ult qalamgerleriniń týyndylaryn qazaq oqyrmandaryna óz ana tilinde tanystyrý jolynda el súıiner jaqsy jumystar istegenin estip, marqaıyp qaldyq. Shekaranyń arǵy betindegi az ulttardyń ádebıetin damytý maqsatynda jaryqqa shyǵyp jatqan «Ulttar ádebıeti» jýrnaly 2012 jyldan bastap Qytaıdaǵy qazaq oqyrmandarymen júzdesti. Atalǵan jýrnaldyń tuńǵysh sanynda arǵy bette Orazhan Ahmet, Jumabaı Bilál, Sháken Ońalbaı, Ákbar Májıt sııaqty qabyrǵaly jazýshylardyń týyndylaryn jarııalapty.
Beıjińdegi Ulttar ýnıversıtetinen magıstratýrany aıaqtaı sala úlken qaladaǵy jalǵyz qazaqsha jýrnaldyń jaýapty redaktory syndy júgi aýyr mindetti arqalaǵan Mınar Nurlázzatqyzy nebári jıyrma kúnniń ishinde jýrnaldyń alǵashqy sanyn daıarlap, oqyrmanǵa usynady. Ol sol sátterin eske alyp:«Jýrnaldyń jaýapty redaktory retinde atalǵan basylymdy laıyqty shyǵara aldym ba, joq pa degen suraqty ózime jıi qoıamyn, biraq bárin ýaqyt kórsetedi. Oqyrman qaýymnyń kóńilinen shyqsaq, sol biz úshin úlken jetistik. Men tek qolymnan kelgeninshe qulshynyp, barlyq múmkindikti paıdalanyp, sapaly jýrnal shyǵarýdy armandadym. Álemde alǵash jaryqqa shyqqan gazet-jýrnaldardyń áý basta tym keremet bolyp ketpeıtini belgili, al men únemi ózime joǵary talap qoıyp, osy bir jýrnaldy qazaq oqyrmanynyń rýhanı azyǵy etsem degen oıymnan eshqashan aınyǵan emespin. Keıde jumystan sharshaıtynyń bar. О́ıtkeni tek osy jýrnaldyń redaksııalyq jumysyn ǵana emes, barlyq ishki-syrtqy sharýasyn túgeldeı ózim atqaramyn. Qansha qıyndyq bolsa da, ádebıetti súıgenim úshin, osy joldy tańdadym», dedi.
Shynynda, bir jýrnaldy jalǵyz daıyndap, ony baspadan shyǵarý ońaı-ospaq sharýa emes. Bul úrdis mol bilimdi, ádebı saýattylyqty, tabandylyqty qajet etetini sózsiz. Osy sharttardyń bárin oryndaǵan Mınardyń eńbegi eresen ekeni shyndyq. Jalǵyz ózi jaýapty da aýqymdy jumysty atqaryp júrgen alystaǵy qazaq qyzynyń ár isine súıinishpen qaraýǵa barmyz.
