Sýretti túsirgen Erlan OMAR, «EQ»
Astanadaǵy «Saryarqa» oıyn-saýyq ortalyǵynyń birinshi qabatynda dızaın jáne tigin sehy ornalasqan Bıbaıat apaıǵa arnaıy baryp kezdesip, tól merekesimen quttyqtadyq. Áńgime barysynda uqqanymyz, keıipkerimiz burymy jelbiregen kúninen bastap kóńili ádemilikke, tiginshilik ónerge qushtar bolypty. Baqytyna oraı mekteptegi eńbek sabaǵynan dáris júrgizgen ustazdary osy salanyń táp-táýir sheberleri eken. Mekteptegi ustazynyń arqasynda sándik ónerdiń bastaýyn meńgerip, ádemi arman, qııaldaryn júzege asyrýdyń joly ashylǵan. Áıtse de, áke-sheshesi daryndy qyzdarynyń bul ónerdiń sońyna túskenin qalamaǵan. Biraq «ótkir kezdik qyn túbinde jatpaıdy», anasynyń tyıym salǵanyna qaramastan, tigin mashınasyn aınalshyqtaýdy tastaı almady.
Búginde jasy egde tartqan apaıymyz: «Ol zamanda, ıaǵnı keńes odaǵy kezinde qarapaıym aýyl, aýdanda sán ónerine degen kózqaras pen jalpy túsinik tym tómen bolatyn. Sondyqtan mektep bitirgende basqa mamandyqty tańdaýǵa májbúr boldyq», deıdi. Almatyda oqyp, jýrnalıstıkada qyzmet istegen Bıbaıat apaı stýdent shaǵynda da, jumys istep júrgen kezinde de tiginshilikti, dızaındy birde-bir ret toqtatpaǵanyn aıtady. Toı-jıynǵa baratyn qyz-kelinshekterge erekshe sándi kıimder tigip beretin. Bul tirliginen tabys tappasa da jany rahatqa bólenetin.
Qazirgi Ulytaý oblysynyń «Jezqazǵan týy» gazetinde korrektor bolyp jumysyn bastap, ári qaraı jýrnalıstıkanyń qyzyǵy men shyjyǵy kóp dúnıesine enip ketti. Jezdi óńirdiń turmys-tirshiligi týraly talaı tatymdy, tanymdyq maqalalardy dúnıege ákeldi. Biraq báribir jan-júregi qalaǵan tiginshilik pen sándik óneri ózine tartyp turatyn. Jýrnalıstıka salasynda jaýapty hatshynyń orynbasarlyǵyna deıin kóterilgen Bıbaıat apaı Jezqazǵan oblysy taratylyp, elordasy Saryarqa tórine kóshken jyldary otbasymen Astanaǵa qonys aýdardy. Jasy 55-ke kelgende áıel kisige jańa jerden jumys tabý ońaı ma? Áıtse de, Bıbaıat apaı oǵan moıymaǵan. Otaǵasyna bala kúngi armanyn aıtyp, jańarǵan zamanda jańa kásip bastaýdy usynady. О́kinishke qaraı, ol kezde tirligi de, tabysy da kómeski tiginshilik pen dızaınerlik kásippen aınalysýdy otaǵasy quptaı qoımady.
Oǵan qaraǵan Bıbaıat apaı bolmady. Táýekelge bel býyp, iske kirisip ketti. Jany qalaǵan jumysy á degennen-aq talaby men armanyn tez-aq alǵa jetelep alyp ketti. Dızaınyn ózi jasap tikken kıim úlgileri kópshiliktiń kóńilinen shyqty. Toı-jıynǵa arnap tikken sándik kóılekteri kózdiń jaýyn alatyn. Sodan óziniń kásibin ashyp, kóp jetistikterge qol jetkizdi.
Qazaqtyń ulttyq kıimderindegi aıryqsha naqyshtardy zamanaýı kıimdermen úılestirip jasaǵan dızaındary jurttyń nazaryn birden aýdardy. Kıim tigip, jańa brendter jasap otyratyn álemdik alpaýyt fırmalardyń kıimin qaltaly adamnyń kez kelgeni alyp kıe beretini málim. Al Bıbaıat apaıdyń ulttyq naqyshpen ádiptep jasaǵan biregeı dızaındary eskimen jańanyń astasýy arqasynda erekshe úılesim tapqan, basqa esh jerden tabylmaıtyn jańa brend edi. Ony 2018 jyly Fransııa astanasy Parıjde ótken Global Fashion Startur kórmesine qatysqanda eýropalyq kıim dızaınerleri joǵary baǵalady.
– Sizderdiń kóne ulttyq dızaın ónerlerińizdiń saqtalyp qalǵany qandaı jaqsy. Ulttyq oıý-órnek naqyshtaryńyz óte ádemi eken. Ulttyq ádipteýmen úılesim tapqan myna kıim úlgilerińiz, sizdiń ózińiz turmaq bizdiń de janymyzǵa tym jaqyn sııaqty. Al biz ulttyq dástúrden qol úzip qalǵan soń, erte dáýirden jalǵasyp kelgen kóp ónerden aıyrylyp qaldyq, – degendi sonda eýropalyq kıim dızaınerleri.
Ultymyzdyń túrli oıý-órnegin paıdalanýmen qatar, Bıbaıat apaıdyń brend kıimder kolleksııasynda quraq úlgide tigilgen kıimderdi kórip tańǵaldyq. Bizdiń bilýimizde qazaqta quraq kórpe, quraq jastyq bolatyn. Desek te, quraq úlgide tigilgen kóılekteri keremet ádemi shyqqan. Ony kórgen qyz-kelinshekterdiń kóńili eriksiz aýatyny anyq. Bul úlgini sán álemine qosylǵan múlde jańa dızaın dep ataýǵa laıyq.
Dızaın salasyndaǵy jetistigi men osy ónerdi damytýǵa qosqan eńbegi úshin eýrazııalyq dızaın odaǵynyń medalimen marapattalǵan keıipkerimiz Aspara fashion week halyqaralyq baıqaýynyń turaqty qatysýshysy. Sondyqtan saladaǵy tynymsyz ilgerileý, barynsha jańaryp, damý isi bir sátke de irkilgen emes. Nátıjesinde, «Atameken» UKP-nyń kásipkerlik usynystar boıynsha «Bıznes Keńesshi» jobasy sertıfıkatynyń jáne Prezıdenttiń «altyn sapa» syılyǵy sertıfıkatynyń ıegeri boldy.
Jany súıgen kásibimen shuǵyldanyp, osynshama jetistikke jetip júrgen Bıbaıat apaıymyzdyń da kóńilinde alań bar. Ol salaǵa memlekettik kózqarastyń ońalmaı turǵany jáne ıne men jipke, kıim dızaıny men sánge qazaq jastarynyń jaqyndaǵysy kelmeıtini.
«Árıne jumysy qıyn, tabysy da tym kóp emes. Eger tigin salasyna memlekettik turǵyda kóńil bólinbese, osy mımyrt tirlik jalǵasa bermek. Qazir elimizde dızaın, tiginshi mamandary daıyndalǵanymen, olardyń baryp jumys istep ketetin jeri joq. Oqýdy jańa bitirgen jastardyń bári de jeke kásip ashyp kete bermeıdi ǵoı. Respýblıkanyń ár-ár jerindegi qadaý-qadaý birli jarym tiginshi-kásipkerler eshqashan óz kúshterimen Qytaıdan, О́zbekstannan, Qyrǵyz Respýblıkasynan aǵylatyn arzan kıim-keshek aǵyndaryna básekeles bola almaıdy. Osyny durys túsinip, tiginshiler máselesi memlekettik deńgeıde qarastyrylyp, sheshimin tapsa, kóptegen jasqa jumys oryndary ashylar edi», dep oıyn jetkizdi Bıbaıat apaı.
Kásipkerdiń kóterip otyrǵan máselesi óte oryndy. Endi úkimettegiler elimizdegi jeńil ónerkásipke moıyn buryp, jaqsy tilekti qaperge alsa quba-qup!
