Qala atymen attas «Almaty» qonaqúıinde oryn tepken aıadaı mýzeıden alma men Almatynyń tarıhynan syr shertetin tańǵajaıyp derekterdi kezdestirýge bolady. Almaǵa qatysy bar ańyzdar men ertegiler, almanyń álemge qalaı taraǵany týraly áńgimeler, baqshashylyq jáne almanyń tasasyndaǵy tylsym mánderge boılatatyn tyń aqparattardyń barlyǵy osynda toptastyrylǵan. Jobaǵa muryndyq bolǵan «Almaly jumaq» qoǵamdyq qorynyń ókilderi shaǵyn mýzeı jyl saıyn jańa jabdyqtarmen tolyǵyp, munda óner kórmeleri udaıy ótip turatynyn aıtty.
– Mýzeıdi uıymdastyrýdaǵy maqsat – qala qonaqtary men sheteldikterge elimizdi almanyń otany ekenin jáne bul jemistiń Almaty men álem úshin mańyzdylyǵyn pash etý. Biz kóp materıal jınaqtadyq. Olardyń arasynda otandyq jáne sheteldik avtorlardyń alma týraly kitaptary, Qazaqstan – almanyń otany ekenin dáleldeıtin fransýz jáne nemister túsirgen derekti fılmder bar. Biz almaly ólkemiz. О́kinishke qaraı qolda bardy baǵalamaımyz. Eki ret alma baǵyn joǵalttyq. Áý basta qala baýraıyndaǵy alma ormandarynan aıyryldyq. Toqsanynshy jyldary qalany ulǵaıtý saldarynan qanshama alma aǵashy joıyldy. Elimizdegi alma kásibin jandandyrý úshin bul taqyrypty keńinen qozǵaımyz. Alma – bizdiń aıryqsha qundylyǵymyz, – deıdi «Almaly jumaq» qoǵamdyq qorynyń basshysy Ajar Jandosova.
Qalanyń kóne mádenıetinen habar beretin almaǵa qatysty derekterdi jiti zerttep, urpaqqa úlgi etýdiń mańyzy zor. Almanyń arǵy otanyna balanatyn alyp megapolıstegi shaǵyn mýzeı qala qonaqtaryn shahar tarıhynyń tylsymyna boılatatyn birden-bir mádenı oryn.
ALMATY
