Alǵysqa bólengen etikshi kelinshek

Ádette túrli aıaqkıimdi jóndeý­shilerdiń deni er adam bolyp keledi. Al olardyń arasynda súırikteı saýsaǵymen etik jóndeıtin áıelder de kezdesedi eken. Áıel zatyna tán emes kásipti serik etkender qata­rynda Gúldana Haýasheva da bar. Onyń kindik qany munaıly túbek atanǵan Mańǵystaý óńirinde tamǵan eken. Alaıda balalyq shaǵy Aqtóbe oblysyndaǵy Reseımen shekaralas Mártók aýdanynda ótken. Oń-solyn tanyp, boıjetken soń 2002 jyly turmysqa shyqqan. Sodan beri Maqat aýdanymen attas kentte turady.

– Bala kezimde kók kózdi qýyr­shaqty qushaqtap, sary shashyn ta­raý­ǵa yqylasym aýǵan joq. Aýlada­ǵy garajda temir-tersekti aýdaryp-tóń­kerý, aıaqkıimdi jóndeý sekildi isterdi unattym. Sol kezde sińlim­niń sporttyq aıaqkıimin jóndep bere­tin edim. Etikshilik – arǵy atalary­myz­dan kele jatqan kásip, – deıdi Gúldana Haýasheva.

Onyń ańsary ózge kásipke emes, etikshilikke aýdy. Sóıtip, 2006 jyly bala kezinen qyzyqqan isine den qoıyp, tapsyrys berýshilerdiń aıaq kıimin óz úıinde jóndeýdi bastady. Alǵashqyda onyń bul isine tańdanys bildirgen az bolmady. Alǵashynda kúdikpen qaraǵandardyń bári keıin onyń aıaq kıimin jóndetýshilerdiń qataryn kóbeıtti. Al 2010 jyly jeke kásibin ashý úshin Maqat kentindegi bazar aýmaǵynan dúńgirshekti jalǵa alýǵa bekindi. Qytaı óndirisinen shyqqan «Versal» markaly tigin máshınkesi bar. Jeke kásibinen tabar násibin molaıtý úshin «Damý» kásipkerlikti damytý qorynan nesıe alǵan.

– Júrek qalaýymen bastaǵan istiń jemisi bolaryna kózim jetti. Keıde sharshaıtyn, densaýlyqqa kóńil bóletin sát bolady ǵoı. Sondaıda kúıeýim de, balalarym da kómektesedi. Tipti qaıyn aǵalarymnyń balalary etikshilikti menen úırenýge nıet bildirdi. Tapsyrys berýshilerdiń tizimi jazylǵan 10-ǵa jýyq qalyń dápterim bar. Etigin jóndetken jandardyń eshqaısysy renishin bildirgen emes. О́ıtkeni tapsyrys berýshilerdiń etigin sapaly jóndeýge mán beremin, – deıdi óz isiniń sheberi.

Etikshiniń aıtýynsha, qaı kásiptiń de qıyndyǵy bar. Kúnine 30-ǵa jýyq tapsyrys túsedi. Tutynýshylar­dyń báriniń talǵamy birdeı emes. Bári de jóndeýge tapsyrǵan etiginiń jańa­dan kem bolmaǵanyn qalaıdy. Biri taǵasyn, endi biri syrmasyn jańartyp berýdi suraıdy. Keıbir etiktiń jyrtyǵyn jamap, ultanyn aýystyrý, boıaý sekildi jumystardy atqarýǵa tózimdilik qajet.

Qazir etikshi Gúldana Haýashe­vanyń shaǵyn sheberhanasy bar. Tapsyrys berýshilerdiń biri kirip, ekinshisi shyǵyp jatady. О́ıtkeni etikshi kelinshek aıaq kıimdi jóndeýmen shektelmeı, tutynýshynyń qalaǵan túsine boıap beredi. Tipti túrli kilttiń kóshirmesin aınytpaı jasaıdy.

Endi onyń aıaq kıim tigýdi qolǵa almaq nıeti bar. Alǵashqysyn kúıe­ýine arnap tikken. Kúzgi maýsymǵa arnalǵan báteńkeniń ólshemi – 43. Biraq aıaq kıimge qajetti bylǵary, ultan, tipti kapron jipti ózge elden aldyrýǵa májbúr bolyp otyr.

– Elimizde bylǵary óńdeý qolǵa alynsa, otandyq ónimdi qýana alar edik. О́ıtkeni etikshilerge sapaly bylǵary óte qajet, – deıdi etikshi kelinshek.

Atyraý oblysy