Baıyrǵy babalardyń saltyna salsaq, kindik sheshe – náresteniń kindigin kesetin kisi. Kóshpeli qoǵamda bul rásimdi elge syıly analar atqarsa, qazir dárigerlerge júktelgen. Sondyqtan ózgermeli ómirdiń zańyna baǵynyp, sábıdi perzenthanadan alyp shyǵatyn jandy «kindik sheshe» dep júrmiz.
Aıtpaǵymyz, qazir kindik shesheni eseppen tańdaıtyn ata-analar kóbeıip keledi. Biri «qyzmette ósýime septeser» dep bastyǵyna (áıel basshyny aıtyp otyrmyz) nemese bastyǵynyń ómirde bir ret te kórmegen áıeline qolqa salsa, endi biri «jaqsy syılyq ákeler» degen pendeshilikpen, et jaqyndyǵy bolmasa da, el aldynda júrgen jaqsylardy tańdap jatady. «Sharapaty tıer» dep bıliktegi alys aǵaıynyn adam salyp kóndiretinder de joq emes. Bálkim, ata-analar jaqsy yrymǵa balaǵandyqtan sóıtetin shyǵar. Biraq arǵy oıynyń adal emes ekeni de ańǵarylyp qalady. Sábıdiń dúnıege kelýin «saıasatqa» aınaldyrý durys emes sekildi.
Qazaqtyń dúnıetanymynda dúnıege kelgen perzenttiń endigi ómirine óz ata-anasynan bólek, kindik sheshe de belgili bir dárejede jaýapty. Olar balanyń ómirde óz jolyn taýyp, azamat bolyp qalyptasýyna qal-qadirinshe qolǵabys etedi. Mundaı mártebege ıe bolǵan búgingi bastyǵyń erteńgi dos-jaryńa, qarjysyna qyzyqqan adamyń et jaqynyńa, bıliktegi táýiriń etene baýyryńa aınalsa, áńgime bólek, árıne. Alaıda shyndyqqa týra qarasaq, jumys aýystyrǵan kúni bastyǵyńdy, qońdanǵan kúni qolǵabys etken jandy umytatynymyz bar ǵoı. Ári-beriden keıin ómir bolǵan soń, búgin jaqsy aralasqan adamyńmen erteń arazdasýyń da múmkin. Sonda qaıtpekpiz? Jelekteı jelkildep ósip kele jatqan ul-qyz kindik sheshesiz jetile bermek pe? Bálkim, jaqyn adamdar da jaǵa jyrtysady ǵoı dersiz. Biraq olardyń ashýy sháıi oramal kepkenshe ǵana. Basqany qaıdam, biraq kindik sheshesi joq balanyń bir búıiri únemi olqy soǵatyndaı kórinedi de turady.
Sanany turmys bılegen soń, týystyqqa júrdim-bardym qaraıtyndar da kezdesedi. Mine, osyndaı jaǵdaıda et jaqyndardyń arasyna bala dáneker bolady emes pe? Bizdińshe, qazirgi kindik shesheniń negizgi mıssııasy da – osy. Sondyqtan balaǵa kindek shesheni tańdarda qýanyshta da, qaıǵyda da qasyńnan tabylar etene adamǵa basymdyq bergen abzal. Al bastyqqa ıakı el aldynda júrgen aıtýly janǵa «kindik sheshe bolyńyz» dep qolqa salǵannan góri, balanyń tusaýyn kestirse jarasatyndaı.
«Kindik sheshe» uǵymyn kirletip alýdyń bir sebebi kindikke degen júrdim-bardym kózqarasymyzdan emes pe eken degen de oı ıekteıdi keıde. О́ıtkeni perzenthanadan shyqqanda «balanyń kindigi ıa joldasy qaıda?» dep suraǵan ata-anany kórgen emespiz. It-mysyq jedi me? Álde qoqysqa tastaldy ma? Eshkim bilmeıdi. Qaısybir jyly Kerekýge qonaq bop kelgen Baýyrjan Momyshulynyń kelini Zeınep Ahmetovadan osynyń jaı-japsaryn suraǵanda, «bul keńes ókimetiniń qazaqqa ǵylymı turǵydan jasaǵan qastandyǵy» degeni este. Zeınep apaıdyń aıtýynsha, ertede qazaqtar er balanyń joldasyn jýyp, aqqa orap, alty qyrdy asyryp kómedi eken. Bul – elin, jerin alty qyrdan qorǵaıtyn azamat bolsyn degeni. Kindigin shańyraǵynyń tabaldyryǵyna kómedi. Bul – bosaǵasyna ıe bolsyn degeni. «Tabaldyryqty baspa» degen yrym sodan qalǵan. Al qyz balanyń kindigi men joldasyn ottyń basyna kómgen. О́ıtkeni ol – oshaqtyń berekesi, altyn dińgegi. Ájelerimizdiń «ottyń basyna túkirme», «ottyń basyn baspa» deıtini sondyqtan.
«Árıne, qazir ottyń basy da, tabaldyryq ta ózgerdi. Biraq Jer-Ana ózgergen joq qoı. Endeshe, joldas pen kindik jerge kómilýge tıis. О́kinishke qaraı, qazaqtyń kindigi jerden ajyrap qaldy. Shynynda, bul qazaq qoǵamy jaqsylap oılanatyn jaǵdaı. Qazir bosanǵan áıelderdi perzenthanada kóp ustamaıdy, ári ketse eki-úsh kúnnen soń shyǵaryp jiberedi. Áıteýir, balanyń kindigi úıde túsedi. Menen jas analar «Kindikti ne isteımiz?» dep suraıdy. «Topyraqqa kómý kerek» dep jaýap beremin. Qurannyń ishine saqtaıtyndar da bar eken. Qasıetti kitapty kindiktiń qorabyna aınaldyrý durys emes», dep edi sol joly batyrdyń kelini.
Kindikke de, kindik sheshege de muqııat bolǵanymyz jón.
