«Daýys» qoǵamdyq baıqaýshylar koalısııasy» respýblıkalyq qoǵamdyq birlestiginiń tóraǵasy Tólegen Kúnádilov júıeli túrde jumys isteýge bel býǵandaryn atap ótti. «Zań sheńberinde komıssııa quryldy. Búginde 10 myńdaı baıqaýshy bar, aldaǵy ýaqytta olardyń sanyn eki eseleýdi josparlap otyrmyz. Adamdar qanshalyqty belsendi bolsa, soǵurlym saılaýdy ádil, burmalaýsyz ótkizýge bolady», dedi qoǵamdyq birlestik tóraǵasy.
Jasyldar partııasynyń jetekshisi óz kezeginde uıym ınfraqurylymdary arqyly 9 600 baıqaýshy qoıýdy josparlap otyrǵanyn, sondaı-aq kúni keshe EQYU-dan baıqaýshylar kelip jumys barysyn tekserip, eshqandaı kedergiler joq ekenin málimdegenin aıtty. Aıta ketsek, aldaǵy saılaýǵa partııa atynan 187 úmitker qatysady. Olardyń 20-y (18-i partııalyq tizim boıynsha, ekeýi majorıtarlyq júıege sáıkes) Májilis depýtattyǵyna, 167-si (91-i partııalyq tizim boıynsha,76-sy majorıtarlyq júıege sáıkes) qalalyq máslıhat depýtattyǵyna úmitker.
«Bul jolǵy saılaý erekshe bolady. Halyqtyń belsendiligi artty, sebebi jańa tulǵalardyń paıda bolǵanyn kórdi. Biz kandıdattarymyzǵa senimdimiz. Olardyń nıeti taza, jalpy biz qaı jaqtan alsaq ta, taza ıdeologııany ustanamyz. Prezıdentimiz «Jańa Qazaqstan – Ádiletti Qazaqstan» dep aıtqan bolatyn, sondyqtan saılaý ádiletti bolatynyna senemiz», dedi «Baıtaq» jasyldar partııasynyń tóraǵasy Azamathan Ámirtaı.
Jalpy, partııa atynan Májilis depýtattyǵyna tizim boıynsha 18 kandıdat usynylǵan. Olardyń qatarynda áıelder kvotasy boıynsha – 4, jastar kvotasymen – 1 jáne múgedektigi boıynsha 1 úmitker bar. Taǵy tórt úmitker majorıtarlyq júıe boıynsha saılaýǵa qatysady. Al jergilikti máslıhattarǵa 160 kandıdat tirkelgen. Esterińizge salsaq, «Baıtaq» jasyldar partııasy 2022 jyldyń sońynda ekologııalyq turaqty qoǵam qurý, halyqtyq demokratııa jáne ekologııaǵa uqypty qaraý qaǵıdattaryn qoldaý maqsatynda qurylǵan bolatyn.
