Aqjoldyqtar elimizdegi eń iri akkýmýlıator zaýyty – «Qaınar-ABK» JShS jumysshylarymen kezdesti. Kásiporynda 1200-den astam adam eńbek etip, mekeme 40 jyldan astam tabysty damyp keledi. Jıyn barysynda partııa basshysy jumysshylarǵa partııanyń saıası baǵdarlamasyn tanystyryp, «Aq jol» jumysyndaǵy basym baǵyttardy atady. Sondaı-aq mundaı salalarǵa memlekettik qoldaýdyń jańa tetikteri qajet ekenin aıtty. Qyzmetkerler baspananyń qoljetimdiligi, BJZQ-daǵy qarajatty basqarý, tutyný nesıeleriniń joǵary paıyzdyq mólsherlemesi týraly suraqtar qoıdy. Zeınetkerlikke shyǵý jasyn tómendetý, eńbek jaǵdaılary aýyr, zııandy jáne asa zııandy jumyskerlerdiń 1 jáne 2 tizimderin qaıtarý týraly ótinishter aıtyldy.
Odan keıin «Aq jol» kandıdattary Taldyqorǵandaǵy kópsalaly aýrýhananyń medısına qyzmetkerlerimen kezdesti. Azat Perýashev naryqtyq medısınalyq saqtandyrýǵa kóshý, dárigerlerge básekege qabiletti eńbekaqy tóleý, MÁMS shottaryn jekelendirý, salamatty ómir saltyn nasıhattaý, densaýlyq saqtaý salasyn sıfrlandyrý boıynsha partııanyń ustanymyn baıandady. Qazybek Isa «Aq jol» fraksııasy men Densaýlyq saqtaý mınıstrligi arasyndaǵy medısınalyq mindetin atqarý kezinde COVID-19 ınfeksııasyn juqtyrǵan medısına qyzmetkerlerine tólemderdi alyp tastaýǵa jol berilmeıtindigi týraly ótkir pikirtalastary týraly, medısına qyzmetkerleriniń quqyǵy men mártebesi týraly zań qabyldaý týraly depýtattyq saýaldardy tilge tıek etti. Aýrýhana dárigerleri men medbıkeleri nesıe paıyzynyń joǵarylyǵyna, baspananyń qoljetimsizdigine, jedel járdem brıgadalarynyń buzaqylar áreketinen qorǵalmaǵandyǵyna shaǵymdandy. Suraqtarǵa jaýap bergen partııa ókilderi «Aq jol» partııasynyń bastamasymen qabyldanǵan jeke tulǵalardyń bankrottyǵy týraly zańynyń qoldaný tártibin túsindirip, Ulttyq bankpen nesıe mólsherlemelerin tómendetýge qatysty pikirtalastary jóninde aıtty.
