Saraıshyqtaǵy sapar ortalyǵy

Atyraý oblystyq qurylys bas­qar­ma­synyń basshysy Nur­bergen Qusaıynovtyń aıtýynsha, byltyrdan beri munda sapar ortalyǵynyń qurylysy júrip jatyr. Ony ótken jyl­dyń sońyna deıin aıaqtaý kózdel­gen eken. Alaıda oblys ákimdigi Qazaq­stannyń ózge óńirlerindegi osyndaı nysandardan ózgeshe bolýy úshin sapar ortalyǵynyń syrtqy kelbetine ózgeris engizý jóninde usynys jasaǵan. Sol sebepten, qurylys jumysynyń merzimi uzartylǵan.

– Qazir sapar ortalyǵynyń quryly­sy aıaqtaldy dep aıtýǵa bolady. Endi jańa nysannyń irgeles aýmaǵyn abattandy­rý úshin tas tóseý, kóshet egý, syrtqy jaryqtandyrý, oryn­dyqtardy ornatý sekildi ju­­mystar atqarylyp jatyr. Biz qurylys nysanyna qadaǵa­laý júrgizip, aldymen sapasyna nazar aýdaryp otyr­myz. Merdigerge qury­lys boıyn­sha eskertýler jasalyp, nátıjesinde qate­likter túze­tildi, – deıdi Nur­bergen Qusaıynov.

Basqarma basshysynyń deregine súıensek, sapar or­ta­lyǵynyń quryly­syna 780 mln teńge bólingen. Osy kezge qarjynyń 90 paıyzy ıge­rilipti. Endi qarjynyń 10 paıyzy nysan tolyq tap­sy­rylǵannan keıin merdi­ger­ge aýdarylady.

Sapar ortalyǵyn ashý kóz­delip otyr. Ortalyqtaǵy jańa mýzeıde al­ty ekspozısııa­lyq zal men kórme pavılony bolady. Mýzeı ekspozısııalaryn ornatý «Qazaq materıaldyq mádenıet ǵylymı-zertteý jáne jobalaý ınstıtýty» JShS-ǵa júktelgen. Seriktestiktiń da­mý jónindegi dırektory Rı­nat Kýtdýsovtyń aıtýynsha, «Sa­raıshyq» sapar ortalyǵy – Altyn Orda kezeńine arnalǵan elimizdegi biregeı nysan.

– Saraıshyq – Uly Jibek joly boıyndaǵy ortaǵasyrlyq qala. Sapar ortalyǵynda mońǵolǵa deıingi, mońǵol kezeńi, sondaı-aq Noǵaı Ordasy men Qazaq handyǵyna arnalǵan birneshe ekspozısııalyq aımaq bolady. Bul ekspozısııalarǵa birqatar qundy dúnıeler, onyń ishinde Saraıshyq qalashyǵynyń materıaldyq muralary, dál osy jerden ár kezeńde tabylǵan jádigerler, Altyn Orda týy nemese búginde keıbir elderdiń memlekettik eltańbalarynda kórinis tapqan qos basty búrkit belgisi qoıylady. Bu­ryn bul belgi Saraıshyqtan tabylǵan edi. Qasym han men Batý hannyń beıneleri alǵash ret osynda kórsetiledi. Bul tulǵalardyń beınelerin jasaý úshin ǵalymdarmen birlesken jumys atqaryldy, – deıdi Rınat Kýtdýsov.

Onyń aıtýynsha, sapar ortaly­ǵynda ǵylymı negizde qaıta jasalǵan Saraıshyqtyń biregeı maketi usyny­lady. Altyn Orda kezeńindegi Saraı­shyq­tyń maketin jasaýǵa ǵalym­dar kómektesken. Al bar­lyq ekspozısııanyń mýltı­medııalyq nusqasy jasalǵan. Bul sapar ortalyǵyna keletin qonaqtardyń qazaq, orys jáne aǵylshyn tilderinde aqparat alýǵa múmkindik beredi.

Atyraý oblysy