Osyǵan baılanysty sý tas qyny qaýpi tónýi múmkin 51 eldi meken tirkelgen. Qazir 15 eldi mekende qaýip seıilgen. Al 36 eldi mekende qaýip saqtalyp otyr. Onyń ishinde 26 eldi meken Jaıyq ózeniniń boıynda ornalasqan. Bul eldi mekenderde tirkelgen 17 myń 30 turǵyn úıde 86 myńnan astam turǵyn bar.
Departament bastyǵynyń mindetin ýaqytsha atqarýshy, azamattyq qorǵaý polkovnıgi Nurlan Jańabaevtyń aıtýynsha, jergilikti menshiktegi Eraly sý toraby Qyzylqoǵa aýdanynda ornalasqan. Bul sý torabynyń jaǵdaıy qanaǵattanarlyq deńgeıde delinip otyr. Arnaıy bekitilgen jol kartasyna 2021 jyly Jaıyq ózeniniń Mahambet aýdanyndaǵy Mahambet aýylynyń tusynda uzyndyǵy 4,5 shaqyrym, Alǵa aýylynyń mańynda 3,2 shaqyrym jaǵalaýdy nyǵaıtý jumystary engizilgen.
Atyraý qalasy men oǵan taıaý ornalasqan Jumysker, Geolog, Aqsaı, Atyraý, Erkinqala, Damby, Balyqshy, Qaıyrshaqty, Keńózek eldi mekenderindegi qorǵanys bógetine kúrdeli jóndeý jumystary júrgiziledi. Jaıyq ózeni men Kaspıı teńiziniń jaǵalaýyndaǵy 86 shaqyrymnan astam qorǵanys bógeti bar.
Sý basý qaýpi bar aýdannyń biri – Inder. Aýdan ákimi Daryn Shamuratovtyń aıtýynsha, qazir sý basý qaýpiniń aldyn alý jumystary júrgizilip jatyr.
– Bıyl qar mol jaýdy. Kún kúrt jylynyp, jaýyn jaýsa, aýdannyń birqatar aýylynda erigen qardyń saldarynan qıyndyq týyndaýy yqtımal. Sol sebepten, aýdan aýmaǵynda qar sýynyń úıge kirmeýin qamtamasyz etý úshin 18 tehnıka jumyldyryldy. Qazir Inderbor kentinde, Jarsýat, О́rlik, Eltaı aýyldyq okrýgterindegi turǵyn úılerdi sý basý qaýpi bolýy múmkin aýmaqtar naqtylandy. Kúsheıtilgen rejimde uıymdastyrylǵan jumystardyń nátıjesinde Jarsýat aýyldyq okrýginde qaýip seıildi, – dep habarlady D.Shamuratov.
Ákimniń málimetinshe, Inder aýdanynda eldi mekenderden 11 myń tekshe metr qar shyǵarylǵan. Kóshelerden 22 motopompamen erigen qar sýy sorylyp jatyr. Bul jumysqa tótenshe jaǵdaılar qyzmetiniń sý soratyn eki kóligi tartylǵan.
Qyzylqoǵa aýdanynyń ákimi Qanat Ázmuhanovtyń deregine qaraǵanda, 7 naýryzǵa qaraǵan túni nóser jańbyr jaýǵan. Jańbyr men erigen qardyń saldarynan Mııaly aýyldyq okrýginde sý deńgeıi kóterilgen. Bul aýylishilik sý basý qaýpin týyndatqan.
– Osyǵan baılanysty Qyzylqoǵa aýdanynyń ákimdigi tarapynan jedel jumystar uıymdastyryldy. Birinshi kezekte sý basqan úılerdi qutqarý jumystary júrgizildi. Mııaly aýylynda 4 vakýým, 6 motopompa, 5 «KamAZ» avtokóligi, 2 tıegish tehnıka jáne basqa da arnaıy quraldar tartyldy, deıdi Q.Ázmuhanov.
Onyń aıtýynsha, tolassyz jaýǵan jańbyr Saǵyz aýylynyń ishimen ótetin Noǵaıty ózeniniń arnasyn toltyryp jibergen. Sol sebepten, ózen jaǵalaýyn bekitý úshin 80-nen astam turǵyn jumyldyrylǵan. Qazir Noǵaıty ózenindegi sý deńgeıi birtindep tómendep keledi. Al Saǵyz ózeninde aǵys báseńdegen.
Jańbyr men erigen qar sýy «Mııaly-Saǵyz» baǵytyndaǵy joldyń 35-shaqyrymyndaǵy tusyn basqan. Bul – Sorkól aýylynyń tusy. Dál osy jerde 7 naýryzda jeńil kólik joldan shyǵyp, erigen qar sýyna batyp ketti. Bul derekti Atyraý oblysy ákimi men oblystyq polısııa departamentiniń baspasóz qyzmetteri de rastady.
«Jergilikti ýaqytpen saǵat 06:30 shamasynda Qyzylqoǵa aýdanyndaǵy Jangeldın aýylynan shyqqan taksı júrgizýshisi kóligimen Sorkól aýylynyń tusynda joldan shyǵyp, jıektegi sýǵa túsip ketken. Oǵan júrgizýshiniń jyldamdyqty asyryp, basqarý júıesin ıgere almaǵany sebep bolǵan. Kóliktegi jolaýshylar zardap shekken joq. Jolaýshylar Sorkól, Saǵyz aýyldaryna jetkizildi» dep málim etti oblys ákiminiń baspasóz qyzmetinen.
Biraq atalǵan jolda kólik qozǵalysyna shekteý qoıylmady. О́ıtkeni erigen qardyń sýynan jolǵa tónip turǵan qaýip joq. Al polısııa departamenti kólik júrgizýshilerine saqtyq sharalaryna asa muqııat bolýdy eskertip otyr.
Atyraý oblysy
