Bul – Mııaly aýylyn tasqyn sýdan qorǵaý úshin jasalǵan áreket. Osydan soń Inder – Qarabaý – Mııaly – Saǵyz tas jolynyń 248-260 shaqyrymynda kólik qozǵalysy shekteldi. Joldyń bul bóligi Mııaly men Jangeldın aýyldarynyń arasyn jalǵaıdy.
Al oblys ákimi baspasóz qyzmetiniń aqparatyna súıensek, bul – byltyr jyrylǵan joldyń bir bóligi. Byltyr topyraq tóselip, kólik ótetindeı etip ǵana jasalǵan. Erigen qar sýynyń kóptigine baılanysty 11 naýryzda tańǵy saǵat 04:45-te topyraq tóselgen joldy qaıta jyrýǵa sheshim qabyldanǵan. Jol jyrylǵan soń tasqyn sý Jarypshyqqan ózeniniń arnasymen aǵyp ketken.
«Josparǵa sáıkes jyrylǵan joldyń bóligine sý ótkizetin arnaıy qubyr qoıylady. Byltyr joldyń bul bóligine asfalt tóselgen joq. Jol tek topyraq tóselgen kúıinde tur», dep málim etti oblys ákiminiń baspasóz qyzmetinen.
Oblystyq tótenshe jaǵdaılar departamenti basshysynyń mindetin atqarýshy Nurlan Jańabaevtyń aıtýynsha, Qyzylqoǵa aýdanyndaǵy Saǵyz, Noǵaıty ózenderiniń arnasyn tereńdetý jumystaryn júrgizip, arnalaryna bóget turǵyzǵan jón. Al Mııaly – Atyraý – Inder tas jolynda Mııaly aýylynan shamamen 600 metr qashyqtaǵy sý ótkizgish turba ornatýdyń qajettigi týyndaǵan.
Biraq jergilikti bılik byltyrǵy kóktemde Mııaly aýylyna tasqyn sýdan tóngen qaýiptiń saldarynan sabaq almaǵany, nátıje shyǵarmaǵany baıqalyp otyr. Sodan beri jyrylǵan jolǵa asfalt ta tóselmegen, sý ótkizetin qubyr da salynbaǵan. Sonda Qyzylqoǵa aýdanynyń ákimdigi bir jyldan beri túk bitirmeı, qol qýsyryp otyrǵan ba?
– Tasqyn sýdan tóngen qaýiptiń aldyn alý úshin jumys istegen eriktilerdiń ekpini Oıyl ózeniniń aǵysynan da qatty boldy. Negizgi jumys eki jerde júrdi. Birinshi top túsqaıta iske kirisip, Oıyldyń Kenen jaqtan Qarasýǵa quıatyn arnasyn túngi saǵat 01:00-ge deıin bitedi. Oǵan kóbine mekemelerden jınalǵan eriktiler bardy. Ekinshi top jyrylǵan joldyń mańynda qapshyqqa topyraq salyp, ony sonaý eski janarmaı beketinen Saqal ata qorymy jaqqa deıin tasydy. Sóıtip, aýyldy aınaldyra bóget saldy. Osy jumystardy erikti jastar atqardy. Olarǵa Jandos Tilekbaev jetekshilik etti, deıdi jergilikti turǵyn Dýlat Ǵubaıdýllın.
Onyń aıtýynsha, bóget salýǵa 100-den astam adam jumylǵan. Eriktiler úıinen kúregi men qapshyǵyn ákelgen. Al Jangeldın aýylynyń Ybyraı Ýahıtov býldozeri traktorymen kelse, Álfarabı Tólenov, Jambyl Berkinuly, Naýryzbek Qanatuly «Gazel», «ÝAZ» kólikterimen topyraq tasyǵan.
Atyraý oblysy
