Partııa ókilderi Shyǵys Qazaqstan oblysyna saparyn qalanyń bıznes qaýymdastyǵymen kezdesýden bastady. Partııanyń teń tóraǵasy Maksım Baryshev partııany qurýdyń alǵysharttarynyń biri eldiń salyq zańnamasyndaǵy kedergiler ekenin aıtty. Qańtar oqıǵasy kezinde qaraqshylyq shabýyldan zardap shekken kásipkerler memleket tarapynan qoldaýǵa ıe bolǵanyn atap ótti. Belgili bolǵandaı, bul qoldaýǵa da salyq salynǵan, ony ózgertý múmkin emes.
«О́tken jyly qańtarda talan-tarajǵa túsken kásipkerlerge memleketten qoldaý suraǵan bolatynbyz, qoldaý kórsetildi. Biraq kásipkerler tabıǵı apattan zardap shekse, tıisti qoldaýǵa salyq salynbaıdy. Al talan-tarajǵa túsken jaǵdaıda salyq salý zańnamada qarastyrylǵan. Biz mundaı jaǵdaılarda salyq salýdy joıý úshin zańnamaǵa ózgerister engizýdi usyndyq, óıtkeni bıznesti qalpyna keltirý máselesi qıyn. Biraq Májilistegi depýtattar bul normany joqqa shyǵardy, bıýdjettik shyǵyn ekenin aıtty», dedi M.Baryshev.
Bul rette partııanyń quryltaıshylary sheneýnikter barlyq kásipkerlerdi salyq tóleýshi retinde qabyldaıtynyn aıtady.
«Olardy bizdiń ekonomıkaǵa, ónerkásipke nemese biz ashatyn jumys oryndaryna qosqan úlesimiz sonshalyqty qyzyqtyrmaıdy. Olar tek bir nárseni oılaıdy – biz salyq tóleımiz. Memlekettik qyzmette bizdi kásipker demeıdi, salyq tóleýshi dep ataıdy. Sebebi 30 jylda ózinen-ózi osylaı qalyptasyp ketken. Sondyqtan bızneske degen osy kózqarasty ózgertý, sondaı-aq kásipkerlerge qatysty ádil ári durys qarym-qatynas bolýy úshin qoldanystaǵy zańnamaǵa ózgerister men tolyqtyrýlar engizýge bastamashylyq etý – partııanyń alǵa qoıǵan maqsattarynyń biri», dedi M.Baryshev.
«Respublica» partııasynan Parlament Májilisiniń depýtattyǵyna kandıdat Zeınolla Abdýmanapov partııanyń kásipkerlik máselelerin jaqsy biletinin atap ótti.
