О́tken sot otyrysynda memlekettik aıyptaýshy tarap sotqa deıingi is júrgizý barysynda sottalýshy Gúlmıra Satybaldynyń Qazaqstannan ketýge árekettengenin habarlaǵan edi.
Prokýrordyń aıtýynsha, Gúlmıra Satybaldyǵa Qylmystyq kodekstiń 389-babynyń 4-bóligi, 389-babynyń 3-bóligi, 28-bóligi, 3-bóligi, 125-babynyń 2-bóligi, 1 jáne 8-tarmaqtarynda kózdelgen qylmystyq quqyq buzýshylyqtardy jasaǵany úshin aıyp taǵyldy.
Buǵan deıin bul qylmystyq is Almatynyń Almaly aýdandyq sotynda qaraldy. Alaıda alǵashqy sot otyrysynda Gúlmıra Satybaldynyń qorǵaýshylary prosesti Astanaǵa kóshirýdi suraǵan. Sýdıa olardyń ótinishin qanaǵattandyryp, isti Astana qalasy Baıqońyr aýdanynyń №2 aýdandyq sotyna jiberdi.
Eske salaıyq, Sybaılas jemqorlyqqa qarsy qyzmet ótken jyldyń naýryz aıynda sotqa deıingi tergeý bastalǵanyn habarlaǵan edi. Is boıynsha aıyptalýshylar Qaırat Satybaldyuly, onyń burynǵy áıeli Gúlmıra jáne basqa da tulǵalar boldy.
Keıin sot Gúlmıra Satybaldyny eki aıǵa qamaýǵa aldy. Bastapqyda ol 747 mıllıon teńgeni jymqyrdy degen kúdikke ilindi. Alaıda keıinirek Antıkor birqatar kásiporyndardyń aksııalary men múlkin zańsyz ıemdený, adam urlaý jáne zańsyz bas bostandyǵynan aıyrý faktileri boıynsha isti tergeı bastady.
Tergeýshilerdiń aıtýynsha, Gúlmıra Satybaldy sýsyn shyǵaratyn iri kompanııalardyń aksııalaryn tartyp almaq bolǵan. Kásipkerlikti reıderlik jolmen basyp alý týraly buǵan deıin eki kásipker málimdegen. Belgili kásipker Tursen Alagýzov ta bul is boıynsha jábirlenýshi ekeni anyqtaldy. Keltirilgen shyǵyn kólemi 6,6 mlrd teńgeden astam boldy.
