Astanada ótken Central Asia First championship – 2023 robottehnıka oıyndarynda elimizdiń túkpir-túkpirinen kelgen 1 200-ge jýyq oqýshy baq synasty. Qaraǵandy oblysynyń namysyn segiz komanda qorǵap, onyń altaýy júldeli oryndar men atalymdarǵa laıyq dep tanyldy. Máselen, oı jarysynda ekinshi oryn ıelengen «Murager» mamandandyrylǵan mektep-lıseı ınternaty oqýshylarynyń JelToqSun komandasy AQSh-ta ótetin First championship – 2023 dúnıejúzilik chempıonatyna joldama aldy.
– Balalar baryn salyp daıyndaldy. Buǵan deıin olar jas robottehnıkterdiń birneshe jarysynda júldeli oryn alǵan edi. Komanda quramynda jeti oqýshy bar. Endi dúnıejúzilik chempıonatqa daıyndalamyz. Osy jarysta mekteptiń taǵy bir komandasy – Alash ınjenerlik sheberliktiń joǵary deńgeıi jáne jobalaýdyń ınnovasııalyq tásilderi úshin Engineering Excellence Award atalymynda marapattaldy, – dedi «Murager» mamandandyrylǵan mektep-lıseı-ınternatynyń ınformatıka jáne robottehnıka muǵalimi Berdibek Qazyǵulov.
Sonymen qatar Best pit award finalist atalymynda Mirinda komandasy jeńiske jetti. Motivate Award atalymynda júlde Buqar jyraý aýdany Úshtóbe tirek mektebiniń Ushtobe team komandasyna buıyrdy. Core value award finalists atalymynda «Daryn» mamandandyrylǵan mektep-lıseı-ınternatynyń Daryn komandasy ozyq shyqty.
– Bul baıqaýda biz óńirlik kezeńde Innovation project atalymynda birinshi oryndy ıelendik. Core values seksııasynda júldeger atandyq. Robottarmen jumys isteýge uzaq ýaqyt jumsaldy. Osy seksııada úzdik ondyqtyń qatarynan tabylǵanymyzǵa qýanyshtymyz, – deıdi «Daryn» mamandandyrylǵan mektep-lıseı-ınternatynyń 8-synyp oqýshysy Abylaı Qadyrbek.
N.Nurmaqov atyndaǵy mamandandyrylǵan mektep-lıseı-ınternatynyń #Nurmakov komandasy da qamshy saldyrmaı, jazda ótetin sheteldik baıqaýlardyń birine joldama aldy.
– Bizdiń joba jeke sektor men aýyldyq aýdandarda elektr energııasynyń úzilý máselesin sheshýge baǵyttalǵan. Muny arnaıy qurylǵylardy úsh fazaǵa ornalastyrý arqyly basqara alamyz. Ol úshin maket jasadyq, qurylǵymyzdyń qalaı jumys isteıtinin kórsettik. Balalar jobany sátti qorǵap shyqty. Degenmen, áli de jetildirý kerek. Jazda Brazılııaǵa nemese AQSh-qa baq synaýǵa baramyz, – deıdi robottehnıka boıynsha jattyqtyrýshy, ınformatıka pániniń muǵalimi Aıdar Seıilhanov.
QARAǴANDY
