Oraldyq jas sazger, bolashaǵy zor ónerpaz Danııar Tańatarov basqaratyn «Alash» etno-folklorlyq ansambli 2019 jyly qurylǵan. 2020 jyly naýryz aıynda alǵashqy konsertin berý úshin daıyndalyp jatqanda aıaq astynan pandemııa bastalyp ketti. Kópshilik shara ótkizýge tyıym salyndy. Sóıtip jas ujym eki jyldaı el aldyna shyǵa almaı qaldy.
– Bul áli qalyptasa qoımaǵan jas ujymǵa ońaı bolǵan joq. Ansambl músheleriniń deni jastar, stýdentter bolatyn. Eki jyl ishinde oqýyn bitirip, ómir aǵynymen ár tarapqa ketkeni bar. Sóıtip, osy konsertke «Alash» ansambli jańǵyryp, jasaryp keldi. Repertýary da baıyp, keńeıe tústi, – deıdi Oral qalalyq mádenıet jáne tilderdi damytý bóliminiń basshysy Serik Qaıyrlıev.
Shynynda da eki jyldyq eriksiz shekteý «Alash» tobyna jaqsylyq ta ákelgen: ansambl múshelerine jańa kıim tigilip, mýzykalyq aspaptarmen qamtylǵan. Kók bóri terisimen ádiptelgen ádemi ulttyq kostıýmder belgili sheber, «MEKO» dızaın-stýdııasynyń dırektory Meńdibek Nurǵalıevtiń qolynan shyǵypty. Sóıtip, syrtqy sáni men ishki mazmuny kelisken ádemi óner ujymy sahnaǵa shyqqan.
Ishki mazmun demekshi, «Alash» etno-folklorlyq ansambli dep aty aıtyp turǵandaı, ujym jetekshisi Danııar Tańataruly áý bastan repertýardy keremet tańdaǵan. Ansambl músheleriniń oryndaýynda Qarshyǵa Ahmedııarovtyń «Altyn uıa» kúıi, Jasaral Eńsepovtiń DEKKO stılindegi «Áke tolǵaýy» shyǵarmasy, baýyrlas noǵaı halqynyń jyrshysy Arslanbek Sultanǵalıevtiń «Dombyra», «Alash urany» týyndylary, «Moldabaıdyń áni» erekshe shyqty. Ánshiler Albına Naýryzálıeva, Ernar О́miráli, Ádil Jáletdenov qulaq quryshyn qandyrdy.
Degenmen, konserttiń basty jańalyǵy – Danııar Tańatarovtyń ózi shyǵarǵan aspaptyq týyndylar boldy. Altyn Orda handyǵynyń 750 jyldyǵyna arnap jazylǵan «Altyn Orda» kúıi, «Jańa Qazaqstan», «Sazsyrnaı», «Elime arnaý», «Azat», «Qandaǵy qasıet» shyǵarmalary erekshe ekpinimen, tyń sarynymen este qaldy. Bir ereksheligi, konsertti top jetekshisi Danııardyń ózi júrgizip, ár shyǵarmanyń mán-mazmunyn ashyp otyrdy.
«Sazsyrnaı aspaby – bala obrazyn, onyń súıkimdi qylyǵy men qýanysh kúlkisin tap basyp somdaıtyn birden bir aspap. Alaıda osy shyǵarmada sazsyrnaı jetkizetin bir muń da bar. Bul týyndymdy men «Bala baqyty» dep atadym. Biz jetimin jylatpaǵan, jesirin qańǵyrtpaǵan elmiz. Toqsan aýyz sózdiń tobyqtaı túıini – sábıdiń bári baqytty bolýy úshin jaralǵan!» – dedi Danııar kezekti shyǵarmasyn tanystyrǵan kezde. Sóıtip, sazsyrnaıǵa arnalǵan shyǵarmasyn ansambldiń súıemeldeýimen ózi oryndap berdi.
Konsertte álemdik mýzyka áleminiń jankúıerleri de syı-sııapatsyz qalmady. Belgili Beltaine tobynyń repertýarynan «Bring to the boil» shyǵarmasy, álemge áıgili Nırvana tobynyń «Smells like teen Spirit» áni ınstrýmentaldy nusqada usynyldy. «О́nerde shekara joq» degen osy ǵoı.
– «Alash» etno-folklorlyq ansambliniń osy repertýaryn Batys Qazaqstan oblysynyń búkil aýdanyna gastroldik sapar josparlap, halyqqa usynǵymyz keledi. Al bolashaqta qazaq óneriniń óreli bir bıigi retinde kez kelgen sheteldik sahnaǵa da shyǵýdan bas tartpaımyz, – deıdi Danııar Tańatarov.
Batys Qazaqstan oblysy
