«Astana opera» halyqaralyq opera akademııasynyń alǵashqy shyǵarylymy daryndy jas ánshilerdi jınady. Olar ustazdary bergen bilim men tájirıbeni asqan qyzyǵýshylyqpen qabyldap júr. Mundaǵy dáris berýshiler de óz isiniń maıtalmandary, – dep atap ótti «Astana Opera» dırektory Ǵalym Ahmedıarov. – Jastar sheber oryndap shyqqan «Iolanta» operasynyń konserttik qoıylymy – olardyń mansabyndaǵy mańyzdy emtıhan, shyǵarmashylyq jetilýdiń jańa kezeńi. Teatrymyzdyń kórermenderi jas daýystarǵa erekshe iltıpatpen qarap, akademısterdi qoldaıdy. Jaqyn arada olardyń óz áleýetterin ashýǵa jańa múmkindikteri paıda bolady degen úmittemiz. Akademııa túlekteriniń Qazaqstanda ǵana emes, shetelde de óner kórsetetinderine senemiz».
«Iolanta» operasy názik lırıkasymen, jasampaz, pozıtıvti oılaýymen, tereń ári taza mánisimen erekshelenedi. Shyǵarmanyń jelisi esińizde bolar, kózi kórmeıtin hám onysyn ózi bilmeıtin Iolanta birde qatty ǵashyq bolady. Uly mahabbatynyń áserinen janary ashylyp sala beredi. Bul bir tańǵajaıyp oqıǵa dersiz. Qoıylymnyń basty ıdeıasyn júzege asyrý úshin rejısser Erenbaq Toıkenov operanyń mazmunyna ekpin jasap, oǵan qarapaıym dekorasııalar qosty, ıaǵnı teatr sahnasynyń zamanaýı tehnologııalyq múmkindikterin paıdalandy. Bul tásil kórermenniń nazaryn mýzyka men solısterdiń daýystaryna aýdartýǵa múmkindik berdi.
Beıtanys adamdardyń kelýi beıqam ómirin túbegeıli ózgertken zaǵıp qyz Iolantanyń basty partııasyn Ulpan Áýbákirova men Áıgerim Amanjolova oryndady. Basty erler partııalary Vodemon men Robertti Saıan Isın men Oraz Muhamedıar, Rasýl Jarmaǵambetov pen Azat Málik somdady. Basty keıipkerdiń ákesi – Rene patshanyń rólinde Valerıı Selıvanov pen Shyńǵys Rasylhan óner kórsetti. Al Brıgıttanyń rólin Nazym Saǵyntaı men Gúldana Aldadosova oryndasa, sondaı-aq Laýrany tanystyrǵan Ásem Áýbákirova men Darıǵa Musaeva kópshilikti daýystarymen baýrap aldy. Mavrıtanııalyq dáriger Ebn-Hakııany Dinmuhamed Kóshkinbaev pen Erjan Saıpov, Almerıkti Nurqanat Tapıev pen Talǵat Allabırınov, qaraýylshy Bertrandy Jandarbek Erkinbaev sheber somdady. Al basty keıipkerdiń kútýshisi Martany «Astana Operanyń» jetekshi solısi Tatıana Vısınskaıa tanystyrdy.
Aıta keteıik, jas oryndaýshylarǵa óner kórsetýge daıyndalýǵa halyqaralyq koýchter – Úlken teatrdyń jastar opera baǵdarlamasynyń kórkemdik jetekshisi Dmıtrıı Vdovın men Armenııanyń Halyq ártisi Barseg Týmanıan kómek kórsetti.
«Ańyzǵa aınalǵan Iolantanyń partııasyn oryndaý men úshin úlken mártebe. О́ıtkeni onymen úzdik álemdik sopranolar sahnaǵa shyqqan bolatyn. Sondyqtan óz rólime barynsha jaýapkershilikpen keldim. Daıyndyq vokaldyq-tehnıkalyq turǵydan erekshe qıyndyqtar týǵyzǵan joq. Keıipkerdiń ýaıymyn, emosııasyn, minezin, ony tolyqqandy adam etip kórsetetin basqa da qasıetterin berý ońaı bolǵan joq. Iolanta ózi múldem beıhabar bolǵan syrqatyna qaramastan ómirdi súıdi. Uzaq oılanyp-tolǵanyp, sáıkes keletin beıneni izdedim. Meniń Iolantam kútýshisine, qurbylaryna, ákesine jáne aınalasyndaǵy barlyq janǵa meıirimdi, kishipeıil, názik, jaıdary da sezimtal», deıdi akademııa solısi Ulpan Áýbákirova.
Operaǵa kelgen kórermen Raýshan Qurmanbaeva «Iolantany» alǵash ret tamashalaǵanyn aıtty.
«Opera akademııasy solısteriniń óner kórsetýlerine birinshi ret kelip otyrǵan joqpyn, ár kelgen saıyn osynaý jas ánshilerge tamsanamyn, qýat alamyn. Ásirese turaqty keletin kórermen osy kásibı ósýdi baıqaıdy. Basty róldi oryndaǵan Ulpan Áýbákirovany erekshe atap ótkim keledi, onyń áýede qalyqtaǵan daýysyn tapjylmastan tyńdadym. Ol Iolantanyń sezimderin dál jetkize bildi», dedi ol.
Eske salsaq, «Astana opera» halyqaralyq opera akademııasy Qazaqstannyń opera ónerin jetildirý jáne álemdik teatr alańdarynda elimizdiń dárejesin arttyrý maqsatynda shyǵarmashyl daryndy jastardy sheteldik koýchtarmen kásibı daıarlaý úshin elorda teatry janynan 2019 jyly qurylǵan edi.
