Bilim ordasy «Aýyldyq aımaqtardaǵy tirek mektepteriniń áleýetin arttyrý» jobasyna engizilgen. Soǵan sáıkes 27 oqý synyby men qosymsha kabınetter qaıta jasaqtalǵan. «Qazaqstan halqyna» qorynan bólingen 249 mln 825 myń teńge demeýshilik qarjyǵa qajetti qural-jabdyqtar satyp alynǵan.
– Aýyldar men qalalarda ornalasqan mektepter arasynda alshaqtyq baıqalady. Bilim berý sapasy ásirese, eldi mekenderdegi mektepterde tómen degen kózqaras bar. Bul – barshany oılantatyn jaıt. Mundaı máseleni júıeli ári keshendi sheshý úshin «Qazaqstan halqyna» qory seriktestermen birge aýyldyq tirek mektepterdi damytý jóninde sheshim qabyldady. Osyǵan baılanysty «Aýyldyq jerlerdegi tirek mektepterdiń áleýetin damytý» baǵdarlamasy aıasynda 17 aýyldyq tirek mektepti jabdyqtap, ádistemelik qoldaý kórsetýdi qolǵa aldyq. Osy kezge deıin óńirlerde 11 mektep qaıta jaraqtandyryldy. Osylaısha, bilim sapasyn kóterý úshin jańa jabdyqtar men daǵdylar shaǵyn jınaqty mektepterge baǵyttalady. О́ıtkeni mundaı shaǵyn mektepterde materıaldyq-tehnıkalyq bazanyń eskiligi men kadr jetispeýshiligi sekildi ózekti másele bar, – deıdi qoǵamdyq qordyń basqarma tóraǵasynyń orynbasary Lázzat Shyńǵysbaeva.
Mektep dırektory Sabyrjan Juparǵalıevtyń aıtýynsha, basqarýshy quramnyń biliktiligi shyńdalǵan. О́zi jáne ádisteme, ınnovasııalyq jumys jónindegi orynbasarlary pedagogıkalyq sheberlik ortalyǵy uıymdastyrǵan «Mektepti tıimdi basqarý: mektep komandasy men bilim sapasy» kýrsynda bilim jetildirgen. Al ustazdar úshin «Baǵalaýdy qalyptastyrý» taqyrybynda dáris ótkizilgen. Matematıka, ınformatıka, aǵylshyn tili, bıologııa, qazaq tili jáne fızıka pánderiniń muǵalimderi atalǵan ortalyqta biliktiligin arttyrǵan.
– Mektebimiz tolyqtaı jańardy. Interaktıvti taqtalarmen, basqa da qajetti jabdyqtarmen qamtyldy. Buryn qolymyz jetpeı júrgen STEM kabıneti ashylyp, oqýshylarǵa jańa múmkindikter ashyldy. Eńbek páni úshin arnaıy jabdyqtar alyndy. Qyzdarymyz tigin mashınkasymen is tigýdi úırenip júr. Oqýshylar túrli robot qurastyrady. Endi bul mektepte alańsyz jumys isteýge, balalardyń sapaly bilim alýyna barlyq jaǵdaı jasaldy. Keleshekte bilim sapasy artady, – deıdi S.Juparǵalıev.
Atyraý oblysy
