Amanattyqtar partııa aldaǵy bes jylda shaǵyn jáne orta bıznesti qoldaýǵa kóp kóńil bóletin jetkizdi. Sondaı-aq úmitkerler saılaýshylardy tolǵandyrǵan túıtkildi máselelerge qulaq túrip, partııanyń saılaýaldy baǵdarlamasymen tanystyrdy.
«Shymkentte 107 myńnan astam kásipkerlik sýbektisi bar. Onda ózderińiz sııaqty 190 myńǵa jýyq adam jumys isteıdi. «Amanat» partııasynyń baqylaýymen 1,2 myń shaǵyn jáne orta bıznes ókilin qoldaýǵa jyl saıyn bólinetin qarajatty paıdalanýdyń tıimdiligin qadaǵalaımyz. 2023-2027 jyldary óz isin bastaımyn degen azamattarǵa jeńildetilgen nesıe men granttyń ashyq jáne ádil bólinýine atsalysamyz», dedi Shymkent qalalyq máslıhatynyń depýtattyǵynan úmitker Janar Bektaeva.
Sondaı-aq «Amanat» partııasynyń respýblıkalyq saılaýaldy shtabynda Talqylau dıalog alańynyń kezekti otyrysynda spıkerler eńbek naryǵynyń erteńin, óńirlerde kadr saıasatyna qatysty júıeli jumys júrgizilmeıtinin, jastar arasyndaǵy jumyssyzdyq máselesin talqylady.
Parlament Májilisiniń depýtattyǵyna kandıdat Ekaterına Smyshlıaeva «Amanat» partııasynyń saılaýaldy baǵdarlamasynda qamtylǵan jumyssyzdyq máselesin sheshý, eńbek qaýipsizdigi jáne onyń qorǵalýy qaǵıdalaryn qatańdatý, «jumys istep turǵan kedeılik» qubylysyn joıý, t.b. sharalardy taldady.
О́z kezeginde Parlament Májilisiniń depýtattyǵyna kandıdat Dınara Sádýaqasova balalar men jasóspirimderdi eńbekke baýlý máselesin qozǵady. Onyń aıtýynsha, saılaýaldy ýádelerdi iske asyrý aıasynda elimizdegi mektepter otbasylyq qundylyqtardy, eńbekqorlyqty, bilim alýǵa degen qushtarlyqty jáne patrıotızmdi qoldap, damytady. Mektep urpaq tárbıesine qatysty jaýapkershilikti bólisip, balalarymyzdy qurdastary men eresekterdiń álimjettiginen qorǵaıdy.
Zańger Áset Dáýitov fraksııanyń bolashaq shaqyrylym depýtattary qarastyratyn eńbek zańnamasyn jetildirý máselesi jóninde óz usynysyn bildirdi. Eske sala keteıik, Talqylau alańynda azamattardy tolǵandyrǵan ózekti máselelerdi sheshý boıynsha usynystar ázirlenedi.
